ХИФУ-га хамандыырдар уонна хамыһаардар оскуолалара үлэлээтэ

Бөлөххө киир:
Хаартыска: устудуьоннар архыыптарыттан.

М.К. Аммосов аатынан Хотугулуу-Илиҥҥи федеральнай университекка устудьуоннар идэлээх сойуустарын таһынан, интэриэстэринэн араас куруһуоктар, успуорт сиэксийэлэрэ уонна устудьуоннар этэрээттэрэ үлэлииллэр.

Ыам ыйын 11-24 күннэригэр сылын ахсын ыытыллар ХИФУ устудьуоннарын этэрээттэрин иһинэн хамандыырдар уонна хамыһаардар оскуолалара буолан ааста.

Устудьуон сыллара — олохпут биир сүрүн түһүмэҕэ. Бу сылларга биһиги элбэх саҥаны билэбит-көрөбүт, мүччүргэннээх сырыылары, тургутуулары ааһабыт. Кэммитин байыта, хатыламмат түгэннэри үксэтэ сатыыбыт.

Хамандыырдар уонна хамыһаардар оскуолаларын сүрүн сыала-соруга — этэрээттэр хамандыырдарын, хамыһаардарын, маастардарын, байыастарын таһымнарын үрдэтии. Бу сылга оскуола «Смена» санаторий-профилакторий баазатын иһинэн ыытылынна.

ХИФУ устудьуоннарын этэрээттэрин хамыһаара Анисия Титова санаатын кытта үллэстэр: «Устудьуоннар этэрээттэригэр 2018 сыллаахтан баарбын. Оскуолаҕа бастакыбын 2019 сыллаахха сылдьыбытым. Билигин номнуо оскуола сүрүн тэрийээччилэригэр баарбын. Оскуолабыт икки нэдиэлэ үлэлээтэ. Маннык уһуннук ыытыллыбатаҕа ыраатта. Оҕолор санааларын истэммит, сыалбытын ситистибит дии санаатыбыт. Сүрүннээн лиидэрдии хаачыстыбаларын иитэргэ үлэлээтибит, араас хабааннаах тэрээһиннэри ыыттыбыт.  Устудьуон олоҕор умнуллубат түгэн буолла ини диэн эрэнэ саныыбын. Ону таһынан, сайыҥҥы үлэбит саҕаланара чугаһаата. Сорохторбут номнуо үлэлии сылдьаллар».

+1
3
+1
0
+1
0
+1
0
+1
0
+1
0
+1
0