Хотугулуу-Илиҥҥи федеральнай университекка 5391 киһи, ол иһигэр 5205 устудьуон уонна 186 ординатор үөрэххэ киирбит. 2021-2022 үөрэх дьылын түмүктэрин үөрэх үлэтигэр проректор Алексей Голиков кэпсээтэ.
Бүддьүөт суотугар 4451, тас дойду гражданнарын ылыы кубуотатын иитинэн 29, төлөбүрдээх үөрэххэ 911 киһи киирбит. “Уопсай куонкуруһунан уонна эбии тургутуута суох бүддьүөт миэстэтигэр киирбиттэр орто бааллара университет үрдүнэн 63,64, биир кэлим эксээмэнинэн (ЕГЭ) киирбиттэр орто бааллара 62,17 тэҥнэһэр. Үөрэнээччилэр олимпиадаларын призердара уонна кыайыылаахтара эбии тургутуута суох 33 абитуриент, онтон биир кэлим эксээмэҥҥэ 80-тан үөһэ орто бааллаах 69 абитуриент күнүскү үөрэххэ киирдэ. Итини тэҥэ, университет быйыл 189 тас дойду устудьуонун ылла. Ордук Египет бэрэстэбиитэллэрэ – 60 киһи ХИФУ Мэдиссиинэҕэ институтун үөрэнээччилэрэ буоллулар”, — диэн проректор бэлиэтээтэ.
2021-2022 үөрэх дьыла төрөөбүт тылларга уонна литэрэтиирэҕэ үөрэнээччилэр бастакы Хотугулуу-Илиҥҥи олимпиадаларын ыытыынан өйдөнөн хаалла. Ол курдук, төрөөбүт тылларга уонна литэрэтиирэҕэ 8 хайысханан (профиль) 3446 оҕо, оттон филологияҕа (нуучча тыла уонна литэрээтирэ) 3204 оҕо бэйэлэрин билиилэрин бэрэбиэркэлэннилэр. Уопсайынан, дойду үөрэххэ министиэристибэтин испииһэгэр киирбит федеральнай университет олимпиадатыгар 65 эрэгийиэнтэн уонна 5 тас дойдуттан араас хайысханан 14 554 үөрэнээччи кытынна. Сыллааҕы түмүгү сиһилии ХИФУ саайтыгар ааҕыаххытын сөп.