Бу нэдиэлэҕэ М.К. Аммосов аатынан Хотугулуу-Илиҥҥи федеральнай университекка үгэс буолбут “Аһаҕас аан күннэрэ” тэрээһин буолан ааста.
ХИФУ киин тутар хамыыһыйата биллэрэринэн, тэрээһиҥҥэ 661 үөрэнээччи сырытта. Университет араас институттарын, бакылтыаттарын бэрэстэбиитэллэрэ Саха сирин араас муннугуттан кэлбит оҕолорго үөрэхтэрин билиһиннэрдилэр, үөрэххэ туттарсыы хаамыытын кэпсээтилэр.
Саҥа бырагыраамалар
Кыттыылаахтары ХИФУ үөрэх чааһыгар проректора Алексей Голиков эҕэрдэлээтэ. Кини, университет устудьуоннарга улахан кыаҕы түстүүр, киэҥ аартыктары арыйар диэн бэлиэтээтэ. Ол курдук, университекка омук сиринээҕи үөрэх кыһаларын кытта 11 сетевой үөрэхтээһин бырагыраамата олоххо киирэн эрэрин сырдатта. Устудьуоннар араас стажировкаларга сылдьаллар, производственнай быраактыкаларын өрөспүүбүлүкэ тас өттүгэр бараллар. Ону таһынан, ХИФУ-га, билим уонна үөрэх хайысхаларын таһынан, устудьуоннар култуурунай, успуорт тэрээһиннэригэр уонна уопсастыбаннай олоххо көхтөөхтүк кытталлар.
Улуустартан
Тэрээһиҥҥэ Уус Алдан улууһуттан Г.В.Егоров аатынан 1 нүөмэрдээх Мүрү орто оскуолатын 10-с кылааһын үөрэнээччилэрэ сырыттылар. Кылаас салайааччыта Ольга Бурцева этэринэн, оҕолор ханнык эксээмэннэри туттарыахтаахтарын көрдүлэр, билистилэр. «Биһиги кылааспыт социально – экономическай хайысхалаах. Холобур, биһигини филологическай бакылтыат, омук филологиятын уонна регионоведение уонна мэдиссиинискэй интэриэһиргэттилэр», — диэн эттэ учуутал.
Виолетта Николаева, Маалыкай орто оскуолатын үөрэнээччитэ:
-Мин инфраструктураҕа технологиятын кэллиэһин, математика уонна информатика институтун, геологоразведочнай, инженернэй – тиэхиньиичэскэй уонна горнай институттар былаһааккаларыгар сырыттым. Инникитин тиэхиньиичэскэй хайысха өттүнэн сайдарга сыал туруорунабын. Үгүс билэр дьонум курдук инфраструктурнай технология кэллиэһигэр үөрэнэр баҕалаахпын. Программист идэтигэр үөрэниэхпин баҕарабын.
Бу сылга ХИФУ-га 4136 бүддьүөт миэстэтэ көрүллүбүт. Бакалавриат уонна специалитет бырагыраамаларыгар үс тыһыынчаттан тахса абитуриены үөрэххэ ылыахтара. Өссө 11 кылаас баазатыгар орто анал үөрэххэ туттарсыахха сөп.