М.К. Аммосов аатынан Хотугулуу-Илиҥҥи федеральнай университет абитуриеннарыгар анаан оскуола тэриллэн эрэр. Манна абитуриеннар Дьокуускайга адаптацияны ааһыы, үрдүк үөрэх систиэмэтин, уопсай олоҕун, уопсастыбаннай тэриллиилэр туһунан сиһилии билиэхтэрэ. Бу туһунан бүгүн сарсыарда «Тэтим» араадьыйаҕа ХИФУ устудьуоннарын идэлээх сойуустарын бэрэссэдээтэлин солбуйааччы Александр Румянцев иһитиннэрдэ.
Кини этэринэн, билиҥҥитэ ХИФУ-га бакалавр уонна специалитет бырагырааматынан үөрэниигэ абитуриеннартан 16 тыһыынча кэриҥэ сайаапка киирбит. Саамай элбэх сайаапканы Мэдиссиинискэй институкка, Математика уонна информатика институтугар уонна Педагогическай институкка биэрбиттэр. Бу көрдөрүүттэн быраас уонна учуутал буолуон баҕалаах дьон элбэҕин туһунан санааҕа кэлиэххэ сөп.
Абитуриент оскуолата олоҕурбут көрүҥүнэн дуу, кэтэхтэн дуу ыытылларын туһунан быһаарыныыны университекка билиҥҥитэ ылына иликтэр. Маны ректор Анатолий Николаев салалталаах Суһал ыстаап быһаарар. Оскуолаҕа сылдьааччыларга идэлээх сойуус лиидэрдэрэ факультеттарынан, институттарынан үөрэх хайдах барарын, туох ыарахаттары көрсүөххэ сөбүн туһунан сиһилии кэпсиэхтэрэ, бэл устудьуоннар куораттарынан экскурсиялатар былааннаахтар. Итиэннэ уопсайга киириигэ туох докумуоннар ирдэнэллэрин, кимнээҕи ылалларын эмиэ сиһилии быһаарыахтара.
Манна диэн суруйдахха, университекка чугас улуустартан сылдьар оҕолору уопсайга ылбаттар диэн олоҕурбут өйдөбүл баар. Александр Румянцев маннык быһаарар:
— Быйыл университекка 5000 кэриҥэ бастакы куурус устудьуона кэлэрэ күүтүллэр. Онтон 1650 оҕотун уопсайга олохтуохтаахпыт. Сайаапкаласпыт устудьуоннартан бастакы уочаратынан социальнай балаһыанньаларын көрөн уонна доруобуйаларыгар хааччахтаах (1-кы, 2-с истиэпэннээх инбэлииттэр, оҕо эрдэхтэриттэн инбэлииттэр), байыаннай эпэрээссийэлэргэ кыттыбыт дьону ылабыт. Бу кэнниттэн хапсыбакка хаалбыт устудьуоннар сайаапкаларын иккистээн эмиэ көрөбүт. Сыл аайы уопсайданыан баҕалаах оҕолор бары киирээччилэр. Манна олоруу ыйга — 945 солкуобай.
Хаартыска: s-vfu.ru