ХИФУ эһиилги үөрэх дьылыттан орто үөрэхтээх медсиэстэрэлэри бэлэмниэҕэ
![](https://edersaas.ru/wp-content/uploads/2019/07/Meditsinskaya-sestra-2-e1564110960667.jpg)
М.К.Аммосов аатынан Хотугулуу-Илиҥҥи федеральнай университет эһиилгиттэн орто үөрэхтээх медицинэ сиэстэрэлэрин бэлэмниэҕэ. Ити туһунан ХИФУ саайтыгар суруллар.
edersaas.ru
Билиҥҥитэ университет Медицинскэй инситутугар бакалавриакка “сиэстэрэ дьылата” диэҥҥэ үөрэххэ ыла олороллор. Аныгы олох сиэринэн, үрдүк үөрэхтэр орто үөрэх тэрилтэлэнэн эрэллэр. ХИФУ итинтэн туора турбат. Ол курдук, университет эһиилгиттэн аны “сиэстэрэ дьыалата” кууруска устудьуоннары бэлэмнииргэ орто анал үөрэх аккредитациятын ааспыт.
Күн бүгүн орто үөрэхтээх сиэстэрэлэри (медицинскэй бырааттары) Дьокуускайдааҕы медицинскэй кэллиэскэ уонна Хаандыгаҕа, Ленскэйгэ, Мирнэйгэ, Ньурбаҕа филиалларыгар, ону таһынан Нерюнгритааҕы, Алданнааҕы медицинскэй кэллиэстэргэ, Жатайдааҕы тиэхиньикумҥа бэлэмнииллэр. Ол да үрдүнэн, Дьокуускайдааҕы медицинскэй кэллиэскэ куонкурус сыллата үрдүк. Үөрэхтэригэр лаппа үчүгэй, сорохтор букатын кырылас биэскэ үөрэнэр медалист оҕолор киирэллэр диэн ааттыыллар. Быйылгы үөрэх дьылыгар Дьокуускайдааҕы медицинскэй кэллиэскэ “сиэстэрэ дьыалата” исписээлинэскэ 200 бүддьүөт, 40 төлөбүрдээх миэстэ көрүллүбүт. Маныаха, холобур, от ыйын 25 күнүнээҕи туругунан, 767 киһи сайабылыанньатын биэрбит. Докумуону атырдьах ыйын ортотугар диэри туталлар, үрдүк үөрэхтэн маппыттар ортоҕо холоноллоро биллэр. Онон өссө үрдүүр чинчилээх. Ол оннугар, улууска үлэлии олорор үөрэх кыһаларыгар куонкурус суоҕун кэриэтэ.
Медицинскэй сиэстэрэ үөрэхтээх эрээри, үлэтэ суох сылдьар киһини көрө иликпин. Эмиэ даҕаны ордук хоту, арҕаа эҥэр улуустарга быраас тиийбэтин кыһалҕата сытыытык турар. Баҕар, сиэстэрэ үксээтэҕинэ, үрдэтинэн, быраас идэтин баһылаан, дьон доруобуйатын тупсараары улууска үлэлии барыан баҕалаах быраас ахсаана үксээрэй диэн эрэл санаа баар.
Людмила ПОПОВА, “Саха сирэ” хаһыат, edersaas.ru
Хаартыска: интэриниэттэн