ХИФУ «Университет дьоруойдара» быыстапканы арыйыа.
Бу хаартысканан быыстапканы университет Татыйааналар күннэригэр, медик-устудьуоннарга анаан тэрийэри былаанныыр. Манна коронавирус дьаҥын утары охсуһууга үлэлэһэр ХИФУ мэдиссинэҕэ институтугар үөрэнэр ыччаттар хаартыскалара киллэриллэллэр диэн университет пресс-сулууспата иһитиннэрэр.
Мэдиссиинэ институтугар 1 700-тэн тахса ыччат үөрэнэр, үөрэхтэрин 352 дипломнаах ординатор салгыыр. Пандемияттан институт кэлэктиибэ туора турбата, чуо бүгүҥҥү күҥҥэ бу сыстыганнаах дьаҥы бохсууга 363 устудьуон уонна ординатордар, 76 волонтер үлэлиир. «Кыһыл зонаҕа» 161 устудьуон уонна ординатор үлэлиир.
Хоруона хамсыга туруоҕуттан устудьуоннар бары үлэҕэ ылсыбытынан барбыттара. «Бары профессиональнай таһымнарын көрдөрдүлэр. «Кыһыл зонаҕа», волонтерунан үлэлээччилэр элбэхтэр. Ахсынньыга 1200-тэн тахса устудьуон үлэлээбитэ уонна практикаҕа тахсыбыта«, — диир медисиинэ институтун дириэктэрэ Николай Гоголев.
Быыстапкаҕа ХИФУ медиадиаполитикаҕа уонна уопсастыбаннаһы кытары сибээскэ управление фотографтарын уонна мэдиссиинэ институтун устудьуона Сардаана Петрова хаартыскаларын көрүөххүт. Хаартыскалар үрдүк үөрэх кыһатын биир кырдьаҕас куорпуһугар — анатомическай куорпуска, институт инновационнай былаһааккатыгар — симуляционнай кииҥҥэ уонна «кыһыл зонаҕа» түһэриллибиттэр.
Сардаана Петрова бастакы хаарыскаларын пандемия саҕаланыытыгар обсерваторга түһэрбит. Инфекционнай отделениеҕа хаартыскаҕа түһэрэр үлэ усулуобуйатыттан соччо кыаллыбат диэн кини бэлиэтиир. «Өскөтүн хаартыскаҕа түһэрбитим буоллар, дьахталлар Саҥа дьыллааҕы салюту түннүгүнэн көрөөрү сүүрэллэрин, ый устата сыппыт кырдьаҕас оҕонньор бастакы хардыыларын оҥорорун, кырдьаҕас эмээхсин кэмпиэтинэн балыыһа иччилэрин күндүлүүрүн, эбэтэр кэллиэгэбит мааскалаах туран кыратык да сибиэһэй салгыны ылаары түннүгү арыйарын түһэриэм эбитэ буолуо. Манна мин сүрүннээн кэллиэгэлэрбин симиэнэлэригэр киириэхтэрин уонна симиэнэлэрин кэнниттэн, медиктэр пациеннарга киирэллэригэр туох бэрэбиэркэни, хонтуруолу ааһалларын түһэрбитим. Бу аан дойдуга суолталаах уонна наадалаах буоларыгар эрэнэбин», — диэбит ХИФУ мэдиссиинэҕэ институтун устудьуона.
Усутдьуон күнүгэр, маны сэргэ, үөрэххэ, наукаҕа, успуорка, айар уонна уопсастыбаннай үлэҕэ ситиһиилээхтэри эҕэрдэлиэхтэрэ. Бырааһынньыктааҕы онлайн-кэнсиэр буолуоҕа, «Университет бастыҥ выпускнига» аат туттарыллыа.
Быһаарыы
«Университет дьоруойдара» быыстапканы ХИФУ медиаполитикаҕа уонна уопсастыбаннаһы кытары сибээскэ управлениета тэрийэр. Быыстапка тохсунньу 25 күнүттэн олунньу 15 күнүгэр диэри «Арассыыйа — мин устуоруйам» пааркаҕа ыытыллар.
+1
+1
+1
+1
+1
+1
+1