ХИФУ босхо миэстэлээх бэлэмниир бөлөхтөрдөөх үөрэх кыһаларын испииһэгэр киирдэ
Соторутааҕыта РФ Наукаҕа уонна үрдүк үөрэххэ министиэристибэтин саайтыгар 2022-2023 сылларга бүддьүөт суотугар бэлэмнэнии бөлөхтөргө үөрэтэр үрдүк үөрэх тэрилтэлэрин испииһэгин таһаарда. Хотугулуу-Илиҥҥи федеральнай университет Арассыыйа 52 субъегыттан атын 77 университеты сэргэ бу испииһэккэ киирдэ.
Ол курдук, ХИФУга 2022-2023 үөрэх дьылыгар барыта 30 миэстэ бүддьүөттэн көрүлүннэ. Ол эбэтэр 30 босхо миэстэҕэ киирэн бэлэмнэнии куурустарыгар үөрэниэхтэрин сөп.
ХИФУ үрдүк үөрэх иннинээҕи уонна идэҕэ туһаайар бакылтыатын декана Светлана Федорова ХИФУ саайтыгар иһитиннэрбитинэн, кэлэр 2021-2022 үөрэх дьылыгар тас дойдуттан кэлии уонна гражданствота суох дьону үөрэтиигэ бүддьүөттэн 15 миэстэ көрүллүбүтүн ыйар. Бакылтыат тас дойду дьонун инженернэй-тиэхиньиическэй, мэдиссиинэ, экэниэмикэ, гуманитарнай хайысхаларга нууччалыы тылынан үөрэх бырагыраамаларын ылыыга бэлэмниир диэн эппит. Хомойуох иһин, Арассыыйа олохтоохторо үөрэнэллэригэр кэлэр үөрэх дьылыгар үрдүк үөрэхтэри сүүмэрдээһин барбатаҕын, ол эрээри, 2022-2023 сылларга бүддьүөттэн 30 миэстэ көрүллүбүтн чопчулаабыт. Онон бүддьүөт суотугар бэлэмнэнии салаатыгар 13 Арассыыйа олохтооҕо үөрэнэр кыахтаммыт. Босхо миэстэлэргэ киирии кэккэ ирдэбиллэрдээх. Кимнээх хапсар кыахтаахтарын туһунан испииһэги ХИФУ саайтыгар киирэн көрүөххэ сөп.
Бэлэмнэнии кууруһугар кимнээх үөрэнэллэрий? Урукку сылларга оскуоланы бүтэрбит эбэтэр баала хапсыбатах дьон. Бэлэмнэнии салаатыгар киирэн биридимиэттэри талан, билиилэрин чиҥэтэн баран эһиил биир кэлим эксээмэни (ЕГЭ) туттарыахтарын сөп. Пандемиянан сибээстээн, иккис сылын ыраахтан олорон (дистанционно) үлэлииллэр. Ол оннугар, куһаҕан да үчүгэйдээх диэбиккэ дылы, улуустар, нэһилиэктэр бэлэмнэнии салаатыгар, араас куурустарга үөрэнэллэригэр кыах үөскээбит.
Быйыл бэлэмнэнии салаатыгар докумуону тутуу от ыйын 1 күнүттэн саҕаланыаҕа диэн этэллэр. Оскуоланы урукку сылларга бүтэрбиттэр төлөөн ханнык баҕарар хайысхаҕа үөрэнэр кыахтаахтар. Сиһилии саайтарыгар көрүөххүтүн эбэтэр 8(4112) 49-68-02 төлөпүөнүнэн, distfdop@mail.ru электроннай буостанан билсиэххитин сөп.
Людмила ПОПОВА, “Саха сирэ” хаһыат, edersaas.ru