ХИФУ баазатыгар байыаннай үөрэтэр киин тэриллиэ.
СӨ Бырабыыталыстыбатын бэрэссэдээтэлэ Андрей Тарасенко РФ Оборонаҕа министиэристибэтин каадырдары аттаран туруорууга сүрүн управлениетын начаалынньыгын солбуйааччы Руслан Миляевы уонна М.К.Аммосов аатынан ХИФУ ректорын Анатолий Николаевы кытта бу боппуруоһунан көрүстэ.
Андрей Тарасенко бу киин байыаннай кафедраҕа майгылыыр буолуоҕун уонна университет устудьуоннара начаалынай байыаннай бэлэмнэниини үөрэхтэн тэйбэккэ барыахтарын бэлиэтээтэ. Бакалавриат уонна специалит бырагырааматынан үөрэнэр устудьуоннар манна сүүмэрдэнэллэр.
Өрөспүүбүлүкэ ХИФУ баазатыгар байыаннай киин тэрийэн үлэлэтэр туһунан этиитин РФ Оборонаҕа миниистирэ Сергей Шойгу өйөөбүтэ. Илиҥҥи байыаннай уокурук командующайыгар сыл иһинэн бу боппуруоһу быһаарарга соруйбута.
Билигин үөрэтэр кылаастары уонна атын үөрэтэр-көмөлөһөр сирдэри тэрилинэн хааччыйаллар. Өрүттэр педагогтары РФ Оборонаҕа министиэристибэтин үөрэтэр тэрилтэлэригэр уонна да атын кыһаларга үөрэтиэххэ сөптөөҕүн дьүүллэстилэр.
Даҕатан эттэххэ, дойду 26 эрэгийиэнин сэргэ өрөспүүбүлүкэҕэ «Авангард» диэн үөрэтэр-методическай киин үлэлиир. Манна Дьокуускайдааҕы кадеттар оскуола-интэринээттэрин баазатыгар тэриллибит. Быйыл сайын РФ Оборонаҕа министиэристибэтин өйөбүлүнэн киин ыччаты үөрэтэргэ наадалаах тиэхиньикэнэн уонна методическай матырыйаалларынан хааччыллыбыт.
+1
+1
+1
+1
+1
+1
+1