Бэҕэһээ РФ Оборуонаҕа миниистирэ Сергей Шойгу ХИФУ-га байыаннай үөрэх киинин тэрийэргэ тустаах министиэристибэ хонтуруолга ыларыгар сорудахтаата. Манна аналлаах мунньахха сэтинньи 24 күнүгэр РФ Оборуонаҕа министиэристибэтин кэллиэгийэтигэр ХИФУ салалтата байыаннай үөрэх киин бырайыагын ситиһиилээхтик көмүскээтэ.
Санатар буоллахха, Ил Дархан Айсен Николаев университекка тустаах үөрэтэр киини тэрийэр кэпсэтиини федераллары кытары быйыл муус устар ыйтан саҕалаабыта. Ол туруорсуута олоххо киирэн эрэр.
«РФ Оборуонаҕа министиэристибэтин хамыыһыйата Дьокуускайга кэлэн анал бэрэбиэркэни ыытан баран, университет байыаннай үөрэх киинин тэрийэргэ бары өттүнэн сөп түбэһэрин быһаарбыта. Биһигини Уһук Илиннээҕи үрдүкү байыаннай училище өйөөтө. Саҥа киин урут аһыллан үлэлии сылдьыбыт байыаннай кафедра дьиэтигэр баар буолуоҕа. Сыл аайы, ортотунан, 4000 устудьуон үөрэниэҕэ. Саамай сүрүнэ, устудьуоннарбыт байыаннай киин аһылларын истэн олус интэриэһиргээтилэр, үөрдүлэр. Билиҥҥи туругунан, 1250 устудьуон үөрэнэр баҕалааҕын тута биллэрдэ. Киин байыаннай тиэхиньикэлэринэн хааччыллыылаах буолуоҕа», — диэн ХИФУ ректора Анатолий Николаев санаатын үллэһиннэ.
Итинэн сибээстээн, ХИФУ-га 2022 сылтан байыаннай исписэлиистэри уонна отделение хамандыырдарын бэлэмнииргэ үөрэтии саҕаланыаҕа. Бастаан утаа 108 устудьуон үөрэниэҕэ.
edersaas.ru