Үөрэх уонна наука

ХИФУ: бүддьүөт, тус сыаллаах миэстэлэр

Үөрэх дьыла түмүктэнэрэ чугаһаата. Оскуоланы бүтэрээччилэри билигин эксээмэн, үөрэххэ туттарсыы боппуруоһа долгутар. Саха сирин сүрүн үрдүк үөрэҕин кыһатыгар – Хотугулуу-Илиҥҥи федеральнай университекка  төһө элбэх бүддьүөт миэстэтэ, тус сыаллаах миэстэ көрүлүннэ, былааннанар?

edersaas.ru

ХИФУ ректора Анатолий Николаев аҕыйах хонуктааҕыта ыыппыт быһа сибээһин кэмигэр: “2020 сылы кытта тэҥнээн көрдөххө, бакалавриакка уонна специалитекка бүддьүөт миэстэтэ 5 бырыһыанынан эбилиннэ, магистратураҕа 7,8 бырыһыанынан аҕыйаата. Уопсайынан, бүддьүөт миэстэтэ 150-нан эбилиннэ”, — диэн иһитиннэрбитэ.

2021-2022 үөрэх дьылыгар 4154 бүддьүөт миэстэтэ көрүллүбүт: бакалавриакка — 1904 (күнүскү), 54 (күнүскү-кэтэхтэн), 400 (кэтэхтэн); специалитекка – 650 (күнүскү), 10 (кэтэхтэн); магистратураҕа – 541 (күнүскү), 44 (күнүскү-кэтэхтэн), 89 (кэтэхтэн); аспирантураҕа – 47 (күнүскү); ординатураҕа – 120 (күнүскү); орто анал үөрэххэ (СПО) – 295 (күнүскү).

Манна даҕатан эттэххэ, былырыын ХИФУга,  уопсайа, 23 155 сайабылыанньа киирбититтэн, 5 509 киһи үөрэххэ киирбит. Итинтэн биир кэлим эксээмэнин (ЕГЭ) 100 баалга туттарбыт 13 киһи, 26 үөрэнээччилэр олимпиадаларын кыайыылаахтара, призердара киирбиттэр.

Тус сыаллаах миэстэ – дьоллоох билиэт диэххэ сөп. 2021-2022 үөрэх дьылыгар барыта 779 тус сыаллаах миэстэ көрүллүө диэн суоттаналлар. Ол курдук, бакалавриакка – 344, специалитекка – 214, магистратураҕа – 103, аспирантураҕа – 15, ординатураҕа – 103 миэстэ. Ректор: “Тус сыаллаах миэстэҕэ туттарсар инниттэн, эрдэттэн үлэ биэрээччини булан дуогабардаһар ирдэнэр. Бу — араас таһымнаах судаарыстыбаннай уорганнар, тэрилтэлэр, судаарыстыбаннай корпорациялар, аахсыйалаах уопсастыбалар, о.д.а. буолуохтарын сөп”, — диэн эттэ. Онон сайыны, үөрэххэ туттарсыы кэмин кэтэһэ барбакка, күн бүгүҥҥүттэн үлэһиккэ наадыйар, төлөөн үөрэттэрэр кыахтаах тэрилтэлэри булан кэпсэтэр ордук.

 

 

Людмила ПОПОВА, “Саха сирэ” хаһыат, edersaas.ru

 

0
0