ХИФУ абитуриеннара уонна устудьуоннара аармыйаҕа барар болдьохторун уһаттарыахтарын сөп

Ааптар: 
Бөлөххө киир:

М.К.Аммосов аатынан Хотугулуу-Илиҥҥи федеральнай университет абитуриеннара уонна устудьуоннара байыаннай сулууспаны түөртэ көһөртөрүөхтэрин сөп. Итиннэ сөптөөх сокуону Судаарыстыбаннай Дуума ылынна.

edersaas.ru

Саҥа сокуоҥҥа олоҕуран, 18 саастарын туолбут, ол эрээри, оскуолаҕа үөрэнэ сылдьар, бакалавриакка,  магистратураҕа үөрэнэр ыччат байыаннай сулууспаҕа ыҥырыы болдьоҕун уһаттарыахтарын сөп. “Итини таһынан, эдэр дьон орто анал үөрэх бырагырааматыгар ыҥырыы болдьоҕун уһаттарар кыахтаахтар. Итиэннэ судаарыстыбаннай үрдүк үөрэх кыһаларыгар бэлэмнэнии салааларыгар бүддьүөт суотугар үөрэнэр дьон эмиэ аармыйаҕа барыылара уһуон сөп. Ол инниттэн оскуоланы бүтэрээт даҕаны ити сыл тута бэлэмнэнии салаатыгар киирэллэрэ ирдэнэр. Уһатыы болдьоҕо – биир сыл”, — диэн сокуон ааптардарыттан биирдэстэрэ, Судаарыстыбаннай Дуума Оборонаҕа кэмитиэтин бэрэссэдээтэлин бастакы солбуйааччы Андрей Красов бэлиэтээтэ.

Университет Хаачыстыбалаах үөрэҕи хааччыйыыга департаменын чахчыларынан, былырыыҥҥы үөрэх дьылыгар 75 устудьуон үөрэҕин тохтотон аармыйаҕа сулууспалыы барбыт. “Бакалаврга, магистратураҕа үөрэнэ киирэр дьон, балаҕан ыйыгар-алтынньыга Военкомакка учуокка туралларыгар, аармыйаҕа барыы болдьоҕун уһаттарыахтарын сөбүн туһунан иһитиннэриини ылаллар. Кинилэр үөрэхтэрин тохтоппот түгэннэригэр, болдьохторун 4-6 сыл уһатыахтарын сөп. Академическай уоппуска ылыахтарын сөп. Оскуола үөрэнээччилэрэ байыаннай билиэттэрин ылалларыгар сүрүнүн барытын быһаараллар”, — диэн департамент үлэһиттэрэ иһитиннэрдилэр.

ХИФУ Киин тутар хамыыһыйатын эппиэттиир сэкирэтээрэ Елизавета Ильина: “Былырыын оскуоланы бүтэрбиттэртэн 1542 киһи биһиги университеппытыгар үөрэххэ киирбитэ. Ол иһигэр үөрэххэ киириилэрин саҕана 18 саастарын туолбут 400 ыччат баара. Саҥа сокуон саҥа үөрэх дьылыгар абитуриент ахсааныгар үтүө өттүттэн дьайара чахчы”, — диэн бэлиэтиир.

ХИФУ пресс-сулууспата.

+1
0
+1
0
+1
0
+1
0
+1
0
+1
0
+1
0