Балаҕан ыйын 2 күнүгэр Times Higher Education (THE) Британия таһаарыыта аан дойду бастыҥ университеттарын ортолоругар 17-с сылын таһаарар эриэйтинин билиһиннэрдэ. Хотугулуу-Илиҥҥи федеральнай университет Арассыыйа 48 университетын кэккэтигэр бастакытын аан дойду эриэйтинигэр (1001+) киирдэ.
edersaas.ru
Аан дойду бастыҥ үрдүк үөрэхтэрин испииһэгэр киирэр улахан бочуот буолар диэн ректор Анатолий Николаев бэлиэтиир. “Ураты суолталаах кирбиигэ таҕыстыбыт. ХИФУ эриэйтиҥҥэ хапсыбыт Арассыыйа 48 үрдүк үөрэҕин кэккэтигэр киирбитэ, биһиги сөптөөх хайысханан баран иһэрбитин, университет тэтимнээхтик сайдарын туоһулуур. Бу, биир мүнүүтэлээх ситиһии буолбатах. Федеральнай университет аатын сүгүөхпүтүттэн 10 сыл устата кэлэктиип билим, үөрэх хаачыстыбатыгар, саҥаны киллэриигэ баһырхай үлэни оҥордо. Үлэбит дьоһуннаахтык сыаналаммытыттан үөрэбит”, — диэн ректор бэлиэтээтэ.
Анатолий Николаев аан дойду эриэйтинигэр киирэр уустугун ыйар. Онно тутуһан, бастыҥнар кэккэлэригэр сылдьар өссө уустугун этэр.
“THE эриэйтинигэр киириибит биһиэхэ саҥа кыахтары арыйар. Бу ситиһии араас бырайыактарга, куонкурустарга, кыттыгас чинчийэр бырагыраамаларга ыйааһыннаах дакаастабылынан буоларыгар эрэнэбит. Бу биһиги уопсай үтүөбүт уонна хас биирдиибит ситиһиитэ”, — диэн ХИФУ салайааччыта этэр.
Times Higher Education World University Rankings эриэйтинигэр 92 дойдуттан 1527 аан дойду бастыҥ үрдүк үөрэҕин кыһалара киирбиттэр. Арассыыйатааҕы үөрэх систиэмэтиттэн 48 үрдүк үөрэх хапсыбыт.
ХИФУ сайтыттан.