Бэҕэһээ М.К. Аммосов аатынан Хотугулуу-Илиҥҥи федеральнай университет ректора Анатолий Николаев 2020-2021 үөрэх дьылын тэрийии туһунан бирикээһэ таҕыста. Онно олоҕуран, бастакы куурус устудьуоннара эрэ олоҕурбут ньыманан (очно) үөрэнэллэр.
edersaas.ru
Бирикээскэ сурулларынан, устудьуоннар уонна үлэһиттэр ортолоругар хамсыгы тарҕаппат туһугар, ХИФУ орто анал, бакалавриат, специалитет, магистратура, аспирантура бырагыраамаларынан күнүскүгэ үөрэнэр 1 куурус устудьуоннарын 2020 сыл балаҕан ыйын 1 күнүттэн электроннай ньыманы уонна дистанционнай технологияны туһанан олоҕурбут ньыманан (очно) үөрэтэргэ диэн ыйыллыбыт. Онтон 2-5 куурус күнүскү үөрэҕэр уонна күнүскү-кэтэхтэн (очно-заочно), кэтэхтэн (заочно) үөрэнэр устудьуоннарын 2020 сыл балаҕан ыйын 15 күнүгэр диэри дистанционнай ньыманан үөрэтэргэ диэн бирикээстээбит.
Ону таһынан, 65-тэн үөһэ саастаах уонна хроническай ыарыылаах педагогическай үлэһиттэр дьарыгы олоҕурбут ньыманан (очно) ыыталлара көҥүллэммэт диэн ыйыллар.
Людмила ПОПОВА, “Саха сирэ” хаһыат, edersaas.ru