“Хендэл” көс общинатыгар быһыт күрүө тутулунна

Ааптар: 
Бөлөххө киир:

Мин  2018 сыллаахха таба үлэтин инники дьылҕатын туһунан бырайыак суруйбутум. Ону Ламынха нэһилиэгин Кэбээйи улууһун сиригэр үлэлии сылдьар сир баайын хостооччу “Прогноз” АУо  толорооччу дириэктэрдээх А.А.Федорова хамыыһыйатын быһаарыытынан, бу мин бырайыакпын сөпкө өйдөөн, үп-харчы өттүнэн өйөөбүттэрэ.  

2020 сылтан саҕалаан бү суолталаах таба мэччирэҥин быһыта, күрүөтэ тутулларыгар улууспут баһылыга И.И.Левин пилораманан  хааччыйбыта. Ону эмиэ ити көмүсчүттэрбит массыыналарынан тиэйэн, Сэбээн курдук ыарахан суоллаах-иистээх  сиргэ тиэрдэн аҕалбыттара. Онно эбии Сэбээн Күөллээҕи тутаах таба хаһаайыстыбатын салалтата күүскэ үлэлэстэ, бэнсиининэн, арыынан, тоһоҕонон, тиэхиньикэлэринэн хааччыйда,  дьону булан үлэлэтэн, бу бүтэй быһыт күрүөбүтүн тутуутун түмүктээтибит.  Онон П.А.Кейметинов аатынан “Сэбээн” МУП  8 ыстаадатыгар, “Хендэл” көс общинатыгар быһыт күрүө тутуутун үлэтэ, дьэ, бүттэ.

Күрүөнү тутууга К.К.Протопопов, М.Б.Протопопов, П.Д.Степанов., Г.А.Захаров, Я.А.Кириллин, О.В.Кривошапкина, суоппардар Г.Е.Кривошапкин,  И.С. Алексеев уонна табаһыттар Г.И.Бурцев, С.А.Слепцов  күүс-көмө буоллулар. Кинилэр бары таба инники кэскилин туһугар кумаары аахсыбакка, сайыҥҥы курулаччы ардахтар, күһүөрү инчэҕэй хаар быыһынан үлэлээтилэр. Билиҥҥи сайдыы хаамыытын  дьүөрэлээн бу курдук табаны бүтэй күрүөҕэ саас төрөтүү уонна күһүн таба саамай ыһыллар, сүтэр кэмнэригэр бу тутуу улахан суолталаах буолуо  турдаҕа.

46 сылы бу таба иитиитигэр үлэлээн, суоттаан- кээмэйдээн, ааспыт сыллар бары сыыһаларын-халтыларын учуоттаан туран, бу кэлэр кэнчээри ыччаппар ханнык туһалааҕы оҥорон хааллардарбын диэн санааттан хара маҥнайгыттан бүтүөр диэри илиибинэн-атахпынан таҕайсан үлэлэспиппиттэн бэйэм бэйэбиттэн дуоһуйдум. Этэргэ дылы, олох сайдыыта түргэнин киһи сиппэт. Ол урукку биһиги курдук кэлиҥҥи табаһыттар көрбөттөрө чуолкай. Бириэмэтэ  да оннук. Көс омук олоҕун оҥкула, тутааҕа — таба эрэ эбээт.Табалаах көһө сылдьан тылтан тиийэ сиэр-туом оҥоһуута барыта күн ахсын тутуһуллан кэллэҕэ. Уонна, дьэ, Дьааҥы сис хайаларын  быыстарынан көс ыал көһө субуруһан истэр ханнык. Табаһыт барахсан дуоһуйбут ырыата ыраахха дьиэрэйдин диэн тураммын бу барытын ис сүрэхпиттэн алҕаатаҕым, арчылаатаҕым буоллун!

Үйэлээх тутуу туһалаатаҕын буоллун! Күрүө иһигэр таба ньиргиэрэ хойуннаҕа буоллун!

Иннокентий Бурцев-Мииччэ уола Нэгиэ,

8-с нүөмэрдээх таба ыстаадатын биригэдьиирэ,

аҕыйах ахсааннаах көһө сылдьар “Хендэл” община  бэрэссэдээтэлэ.

Хаартыскалары: Л.Бурцева ыытта

+1
0
+1
0
+1
0
+1
0
+1
0
+1
0
+1
0