Кытай Хэйхэ куоратын дьаһалтатын тас дьыалаҕа кэнсэлээрийэтин начаалынньыга Ло Фэй салайааччылаах дэлэгээссийэ Уус Алдан улууһугар сырытта.
edersaas.ru
Санатан эттэххэ, бу куорат Дьокуускайы кытары ини-бии куорат буоларын быһыытынан, Саха Өрөспүүбүлүкэтин кытары норуот хаһаайыстыбатын араас эйгэтигэр бииргэ үлэлэһэр. Улуус баһылыга Алексей Федотов ыалдьыттарыгар улууһун олоҕун-дьаһаҕын, үлэтин-хамнаһын билиһиннэрдэ. Кытай дьоно Уус Алдан улууһун истэн эрэ билэр буолбатахтар, ол курдук былырыын Фуюань уезтан учууталлар кэлэннэр, Мүрү бастакы нүөмэрдээх орто оскуолатын үөрэнээччилэрин кытай тылыгар үөрэппиттэрэ. Онон, ыалдьыттар сылдьыбыттарыгар оҕолор бэйэлэрин билиилэрин көрдөрдүлэр, тэттик кэнсиэрдинэн эҕэрдэлээтилэр.
Хэйхэттэн кэлбит ыалдьыттар салгыы “Мүрү-Ас” кэпэрэтиипкэ сылдьан, аһылык комбинатын бородууксуйатын, ол иһигэр сир аһыттан оҥоһуллубут аһы-үөлү амсайаннар, экологическай ыраас итиэннэ натуральнай аһылыктан улаханнык астыннылар. Бииргэ үлэлээһин биир хайысхатынан сир аһын астааһын технологиятыгар уопуту атастаһыы буолуон сөбүн эттилэр.
— Биһиги куораппыт Саха Өрөспүүбүлүкэтин кытары доҕордоспута ыраатта. Мин дьаһалта тас дьыалаҕа кэнсэлээрийэтигэр үһүс эрэ сылбын үлэлиибин эрээри, Саха сиригэр номнуо ахсыс сырыым. Уус Алдаҥҥа сылдьыбыппыттан олус астынным, кэлэр өттүгэр бииргэ үлэлэһиэхпит диэн эрэнэбин, — диэтэ Ло Фэй.
Анна СЕРГУЧЕВА, «Саха сирэ» хаһыат, edersaas.ru саайтка анаан