“Поехали!” – диэбитэ нууччалыы Хэйлунцзян провинциятын губернатора Хуа Чаншэн, бу кэнниттэн Хэйхэ — Благовещенскай муостатынан таһаҕас тиэммит массыыналар утары айаннаабыттара.
Бэс ыйын 10 күнүгэр Кытайы уонна Арассыыйаны ситимниир муоста аһыллыыта буолбута. Манна вице-премьер, Уһук Илиҥҥэ бастайааннай боломуочунай Юрий Трутнев, КНР Судаарыстыбаннай Виталий Савельев уонна Уһук Илини, Арктиканы сайыннарыы миниистирэ Алексей Чекунков кыттыыны ылбыттара.
Муоста ортотугар Амурскай уобалас губернатора Василий Орлов уонна Хэйлунцзян губернатора Хуа Чаншэн көрсүбүттэрэ. Бу муоста икки дойду экэнэмиичэскэй балаһыанньаларыгар, хардарыта дьайсыыларыгар, атыы-эргиэн сайдарыгар улахан суолталаах диэн бэлиэтээн эппиттэрэ. Сылга мөлүйүөн туонна таһаҕас тиэллиэ диэн тырааныспар миниистирэ үөрүүлээх быһыыга-майгыга этэн турар. Оттон Ху Чуньхуа “бу муоста доҕордоһуу, бииргэ үлэлэһии бэлиэтэ буолуо, биһиги хаачыстыбалаах логистическай өҥөнү оҥорорго бэлэммит” диэбитэ.
Муоста билигин номнуо үлэлээн эрэр. Амур өрүһү туораан, атын дойдуга тахсыы сыаната 8700 солкуобай диэн быспыттара. Олохтоохторго бу сыана ыарахан диэн мөккүөр тахсыбыта.
Губернатор Василий Орлов бэс ыйын 14 күнүгэр бу курдук иһитиннэрдэ:
— Благовещенскай — Хэйхэ муостанан айан атырдьах ыйа бүтүөр диэри босхо буолуо. Билигин кыраныыссаны туорууру хонтуруоллуур пуун сууккаҕа 16 чаас үлэлии турар. Сырыы элбээтэҕинэ, күнүстэри-түүннэри да үлэлэтиэхпит.
Благовещенскай — Хэйхэ хайысхатынан Амур өрүһү туоруур муоста 2016 сылтан икки кытылтан тэҥҥэ тутуллан саҕаламмыта. 2020 сылга бүтэрэр былааннаахтар этэ да, пандемия мэһэйдээбитэ.
Муоста уһуна – 1080 миэтэрэ, кэтитэ 18 миэтэрэ, массыына айанныыр балаһатын кэтитэ – 11 миэтэрэ. Барыта 19 миллиард солкуобай ороскуоттанна, икки дойду кыттыһан туттулар. Күн аайы 630 таһаҕас массыыната, 164 оптуобус, 68 кыра массыына айанныыр кыахтаах.
Онон Саха сирин олохтоохторо бу сайын бэйэлэрин массыыналарынан айаннаан тиийэн, Кытайга босхо тахса сылдьыахтарын сөп.
Ангелина Васильева, “Саха сирэ” хаһыат, edersaas.ru
Хаартыска: rg.ru.