Балаҕан ыйын 12 күнүгэр Бүлүү өрүскэ Оччугуй Ботуобуйа аттынан 65 тыһыынча хатыыс ыаматын ыыттылар. Бу Ил Дархан Айсен Николаев экология туһунан стратегическай ыйааҕын уонна “АЛРОСА” айылҕаны харыстыыр тэрээһиннэрин чэрчитинэн буолла.
Балыктары ыытыыга Айсен Николаев, бырабыыталыстыба бастакы вице-премьерин э.т. Кирилл Бычков, “АЛРОСА” бырабылыанньатын бэрэссэдээтэлэ Сергей Иванов, экология, айылҕаны, ойуур хаһаайыстыбатын туһаныы миниистирэ Сахамин Афанасьев уонна Мииринэй оройуонун баһылыга Ришат Юзмухаметов кытыннылар.
Айсен Николаев балыктары ыытыы, көрүҥнэрин элбэтии үлэтэ үчүгэй түмүктээҕин бэлиэтээтэ.
— Быраҥааттаны тутуу кээмэйэ улааппытын көрөбүт. Хатыыһы иккис сылын өрүстэргэ ыытыы үлэтэ үтүө түмүктэри биэриэ диэн эрэллээхпин. Чернышевскайдааҕы балык собуотун уонна экология министиэриситибэтин өрүстэргэ, күөллэргэ балык көрүҥэ элбииригэр үлэлэрин хайгыахпын баҕарабын. Бу үлэ өссө салҕаныаҕа, — диэн кини эттэ.
Сергей Иванов “АЛРОСА” экологияҕа элбэх үлэни ыытарын кэпсээтэ. Урут быраҥааттаны, чыыры ыыппыт буоллахтарына, билигин сыаналаах балыгы – хатыыһы элбэтэр былааннаахтар. Ону тэҥэ, Бүлүү сүнньүн улуустарын ыраас уунан хааччыйыы бырагырааматыгар хампаанньа өрөспүүбүлүкэ салалтатын уонна Үүнэр көлүөнэлэр пуондаларын кытта 5 сылга үбүлээһинин уһатар туһунан быһаарыы ылыммыттар. Ол эбэтэр, сылга 150 мөлүйүөн солкуобай буолар. Ол чэрчитинэн, ууну ыраастыыр станциялар тутуллуохтара, сир анныттан ыраас ууну көрдүүргэ геологическай үлэлэр ыытыллыахтара.
Өрөспүүбүлүкэҕэ балык саппааһын элбэтэр кыахтаах соҕотох тэрилтэнэн Чернышевскайдааҕы балыгы иитэр собуот буолар. Собуот 1,76 мөлүйүөн хатыыс искэҕин инкубациялаан, улаатыннартыан сөп.
Кэлэр сылларга Индигирка уонна Халыма өрүстэргэ хатыыһы элбэтэр былааннаахтар. Ону тэҥэ, атын да өрүстэргэ чыыр, муксуун, тууччах курдук сыаналаах балыктар элбииллэригэр үлэ барыаҕа.
Ангелина Васильева, “Саха сирэ” хаһыат, edersaas.ru