Сүрүн

Хатырыкка элбэх хайысхалаах киин тутуллуо

Бүгүн, муус устар 26 күнүгэр, Ил Дархан Айсен Николаев Нам улууһугар үлэлиир.

Бары бэркэ диэн билэрбит курдук, сарсын, муус устар 27 күнүгэр, Саха АССР тэриллибитэ 100 сылын бэлиэтиэхпит. Ил Дархан сарсыарда 10 чаастан Аппааныга Аҕа дойду Улуу сэриитин сылларыгар саха омугун хоргуйан өлүүттэн быһаабыт, Саха сирин автономиятын көмүскэспит, саха норуотун биир чулуу уола Илья Егорович Винокуровка аналлаах паамытынньыкка сибэкки дьөрбөтүн ууруу сиэригэр-туомугар кытынна. Санатар буоллахха, Илья Винокуров 1943 — 1946 сс. Саха АССР Совнаркомун бэрэссэдээтэлинэн уонна 1946 -1952 сс. Саха сирин обкомун бастакы сэкирэтээринэн таһаарыылаахтык үлэлээбитэ.

Ил Дархан Айсен Николаев Аппааныга сылдьан баран, Саха АССР тэрийсибит саха норуотун уһулуччулаах уола Максим Кирович Аммосов күн сирин көрбүт төрөөбүт сиригэр-уотугар — Хатырык нэһилиэгэр култуурунай-спортивнай элбэх хайысхалаах киин бастакы сыбаайатын туруорарга аналлаах үтүө тэрээһиҥҥэ кыттыыны ылла.

 

Эбийиэк тутуутун сакаасчытынан СӨ судаарыстыннай сакаас сулууспата буолар. Сүрүн бэдэрээтчит — «Намстрой» ХЭУо. Былаан быһыытынан, тутуу үлэтэ бүгүҥҥүттэн саҕаланан 2023 сыл ахсынньытыгар түмүктэниэҕэ. Эбийиэк уопсай иэнэ 2518.2 кв.м. Киин архитектурнай бырайыага олус ураты. Ол курдук, элбэх подъезтаах буолар. Бастакы мэндиэмэн 3.6 м, оттон иккис — 4 м үрдүктээх буолуохтара. Спортивнай комплекс 18 м да 30 м иэннээх дэгиттэр дьарык саалатыгар биир симиэнэҕэ 36 киһи сылдьыаҕа. Итини тэҥэ, 60 киһиэхэ аналлаах оҕо ускуустубатын оскуолата, 150 миэстэлээх актовай саалалаах «Сайдам» диэн норуот айар дьиэтэ уонна 20 миэстэлээх уонна 10000 туом кинигэлэрдээх бибилэтиэкэ үлэлиэхтэрэ.

Александр ТАРАСОВ, «Саха сирэ» хаһыат, edersaas.ru

Хаартыскаларга Андрей Сорокин (СИА), Александр Тарасов түһэриилэрэ

 

 

0
0
Telegram @edersaas20