“Хаачыстыбалаах уонна куттала суох айан суоллара” национальнай бырайыак чэрчитинэн, Нам улууһугар элбэх үлэ ыытыллар.
Быйыл балаҕан ыйын бүтэһик күннэригэр Хатырыкка диэри 18,5 км усталаах суолу оҥоруу түмүктэниэҕэ. Бу учаастакка суолу асфаллааһын үлэтэ биллиилээх судаарыстыбаннай, политическай деятель Максим Аммосов 125, Саха АССР төрүттэммитэ 100 сылын көрсө ыытыллар.
– Икки сыллаах хантарааҕынан барыта 18,5 км асфальт суол оҥоһуллуохтаах, – диир “СУ-77” ХЭТ генеральнай дириэктэрин солбуйааччы Петр Бурнашев. – Былырыын 5 км ууруллубута, быйыл 13,5 км асфальт кутуллан, бүтэр түмүккэ чугаһаатыбыт. Балаҕан ыйын 20 күнүгэр диэри бүтэрэр былааннаах үлэлии сылдьабыт.
Асфальт кэнниттэн тротуар, бордюр, разметка үлэтэ ситэриллиэхтээх. Кыраапык быһыытынан алтынньы 5 күнүгэр диэри үлэ бүтүөхтээх диэн Нам улууһун дьаһалтатын пресс-сулууспата иһитиннэрэр.
Раиса Сибирякова.