«Агростартап» гранын ылбыт дьон сүрүннээн үлэлэрин саҥа саҕалыыр ыччат буолар.
Ол эрээри үлэһит быһыытынан дойдуларыгар бэйэлэрин номнуо көрдөрбүт, итэҕэли ылбыт дьоннор, туруу үлэһиттэр.
Көрүүтүн-истиитин ыарырҕатан, үгүс ыаллар сүөһүлэрин эһэр санааҕа киирбиттэригэр, Хатырык нэһилиэгин дьаһалтата 2019 сыллаахха сүөһү көрүүтүгэр өҥөнү оҥорор кэпэрэтииби тэрийбитэ. Улахан хотону туппута. Идэтинэн физкултуура учуутала үөрэхтээх, эдэр ыал аҕата Айсен Парников бу кэпэрэтииби моой-арҕас ылынан икки сыл таһаарыылаахтык үлэлэттэ. Ааспыт кыстыкка алта ыалтан хомуллубут 53 сүөһүнү, ол иһигэр 25 ыанар ынаҕы көрбүтэ-истибитэ. Учуутал идэлээх киһи тыа хаһаайыстыбатынан олохтоохтук ылсан дьарыктанар сыалтан, быйылгы куонкуруска кыттан «Агростартап» гранын ылла.
Онон күн бүгүн тус бэйэтин хаһаайыстыбатыгар уонча сүөһүлээх, ол иһигэр биэс ыанар ынахтаах буоллаҕына, сыллата сүөһүтүн ахсаанын элбэтэргэ итиэннэ үүтү-эти оҥоруу таһымын тупсарарга былааннанар.
Раиса Сибирякова.