Чурапчы улууһугар «Тыа сирин кэлим сайыннарыы» федеральнай бырайыак чэрчитинэн «Хатылы нэһилиэгин кэлим тутуута» бырайыак үлэтин саҕалаата.
edersaas.ru
Бу күннэргэ улуус баһылыга Андрей Ноговицын Хатылыга тахсан, ыытыллар үлэни-хамнаһы билистэ. Бу бырайыагы олоххо киллэрии нэһилиэк 185 сылын туолар үбүлүөйдээх сылыгар улахан суолталааҕын бэлиэтээтэ. «Хатылы нэһилиэгин кэлим тутуута» бырайыак Саха сиригэр бастакы уонна федеральнай бырагырааманан үбүлэнэр. Эһиил өрөспүүбүлүкэҕэ сэттэ маннык бырайыак олоххо киллэриллиэхтээх.
Нэһилиэк баһылыга Ульяна Атласова бырайыак чэрчитинэн үлэтэ быйыл кыһын саҕаламмытын, 2024 сылы көрсө бүтэриллиэхтээҕин кэпсээтэ. Ураты миэстэни 32 учаастактаах, аныгы ирдэбилинэн тупсаҕай дьиэлэрдээх «Сайдыы» кыбаартал ылар. Үбүлээһин үс түһүмэх (федеральнай, өрөспүүбүлүкэтээҕи уонна олохтоох) бүддьүөтүнэн оҥоһуллар. Маны таһынан Култуура дьиэтэ, «Халыма» айан суолугар сервис өҥөтүн тэрийэр дьиэ тутуллуохтаахтар, 1,8 км усталаах бөһүөлэк иһинээҕи суол, уу ситимэ, сэрии бэтэрээннэрин искибиэрэ оҥоһуллуохтаахтар. «Лахалдьы» быһыта сөргүтүллүөхтээх, хотон тутуллуохтаах, 40 гектар бааһына сирэ таҥастаныахтаах.
Көрсүһүүнү түмүктүүрүгэр Андрей Ноговицын нэһилиэк туруктаахтык сайдарын бэлиэтээтэ, бырайыагы олоххо киллэрии үлэтэ тэтимнээхтик саҕаламмытын хайҕаата. Нэһилиэккэ 320 чааһынай ыал олорор. Бүдьүөт тэрилтэлэрин таһынан 12 бааһынай хаһаайыстыба, биир сүөһү иитэр кэпэрэтиип бааллар, нэһилиэнньэҕэ өҥө араас көрүҥүн оҥорууга сэттэ урбаанньыт үлэлиир. Бас билии көрүҥүттэн тутулуга суох нэһилиэк үрдүнэн 965 ынах сүөһү, ол иһигэр 360 ыанар ынах, 1132 сылгы, 39 сибиинньэ, 258 куурусса баар. Ааспыт сыл түмүгүнэн, 333 т үүтү туттарыллыбыт, 2199 т от оттоммут. Бу хайысханы өссө сайыннарарга былаан киэҥ, онно дьоһун хардыынан бырайыагы олоххо киллэрии буолар диэн нэһилиэк дьаһалтата иһитиннэрдэ.