Хатылаевтар “Улуу Солко суолунан!” биирдэ эрэ буолар кэнсиэргэ ыҥыраллар!
“Тэтим” күпсүүр-бөлөх салайааччылара биллиилээх музыканнар Клавдия, Герман Хатылаевтар көҕүлээһиннэринэн, Саха Өрөспүүбүлүкэтин Култууратын министиэристибэтин уонна “Россия-Япония” Уопсастыба өйөбүллэринэн, от ыйын 27 күнүгэр 19 чаастан Дьокуускайга, “Сэргэлээх уоттара” Култуура киинигэр “Улуу Солко суолунан!” — хаһан даҕаны хатыламмат, сэдэх, чаҕылхай кэнсиэр буолар.
Бу ураты тыыннаах кэнсиэргэ Япония “ДАЭН” бөлөҕүттэн күпсүүргэ оонньуур эдэр толорооччулар (барабанщиктар), Дьокуускайтан “Тэтим” бөлөх итиэннэ Непал, Япония, Монголия курдук үгүс киһи интэриэһин тардар судаарыстыбалартан үрэн оонньонор тэриллэр чулуу маастардара (флейтистэр) кыттыыны ылыахтара. Билиэт «Сэргэлээх уоттара» КК уонна «Киин» киинэтыйаатырын кассаларыгар атыыланар.
— Непалтан ини-бии уолаттар Панга Лама уонна Думьян Шираван Лама индиийискэй барабааҥҥа уонна флейтаҕа оонньуулларын киһи иһиттэр-истэн олоруох курдук… Итиэннэ Японияттан Тэракадо Мицугу, Кимура Синсукэ, Саха сиригэр олорор Монголия бэрэстэбиитэлэ Балдорж Хухээгийн курдук бэйэлэрэ ураты суоллаах-иистээх айар куттаах дьоннор бааллар. Музыканнары “Улуу Солко суолунан” Азия норуоттарын музыкальнай бэстибээллэрин сүрүн тэрийээччи Оно Ре салайан аҕалыаҕа.
Маннык кэнсиэр биирдэ эрэ буолар, онон, ытыктабыллаах Сахабыт сирин олохтоохторо, үтүө түгэни мүччү тутумаҥ!, — диэтэ Клавдия Хатылаева.
Татьяна МАРКОВА,«Саха сирэ» хаһыат, edersaas.ru
[vc_video link=»https://youtu.be/VUyp7FlUzzk»]