Нам улууһугар Хатыҥ Арыыга коронавируһу утарар үлэлэр тиһиктээхтик салҕаналлар.
Ол курдук, кырдьаҕастарыгар уонна дьиэҕэ олорор дьоҥҥо мааскалары тигэн буор-босхо тарҕаппытар. Маныаха мааскалары ким баҕарар тигэн күн ахсын олохтоох дьаһалтаҕа көмөлөһөбүт диэн аҕала тураллара бэлиэтэнэр. Оттон «Ромашка» оҕо саадын кэлэктиибэ мааскалары тигиигэ улууска ыҥырыы таһаарбыта бу нэһилиэк дьоно-сэргэтэ кыһалҕалаах кэмҥэ туора турбакка кимиэхэ баҕарар көмөлөһөргө бэлэмнэрин, аһыныгас дьоннооҕун бигэргэтэр.
Нэһилиэк олохтооҕо, урбаанньыт Владислав Соловьев улууһун дьонугар-сэргэтигэр көмөлөһөн, 500 устуука медицинскэй маасканы уонна испиири улуус баһылыгар Юрий Слепока туттарбыт. Улууска да, нэһилиэктэргэ да сэрэтэр-өйдөтөр иһитиннэриилэр, ылыныллыбыт бирикээстэр ватсабынан тарҕатыллан иһэллэр. Тэрилтэлэргэ коронавирус кутталын туһунан сэрэтэр-өйдөтөр былакааттар, бу ыарыыттан харыстанар сүбэлэр, быраабылалар ыйаммыттар. Нэһилиэккэ обсерватор уонна изоляциялыыр анал дьиэлэр бэлэмнэниллибиттэр.
Тэрилтэлэртэн, олохтоохтортон күн ахсын ким ханна барарын-кэлэрин туһунан иһитиннэриини хамыыһыйа ыла олорор диэн олохтоохтор иһитиннэрэллэр.