Хатаска Улуу Кыайыы 75 сылыгар анаммыт Аҕа дойду улуу сэриитин кыттыылаахтарыгар аналлаах Саллаат пааматынньыгын оҥордулар.
edersaas.ru
Бу туһунан уопсастыбанньык Наталья Руфова кэпсиир:
—Саллаат пааматынньыга турар былаһааккатын анал билиитэлэринэн тэлгээн, хаамарга-сылдьарга табыгастаах гына «Түөлбэ» түмсүү салайааччылара: «1-кы Баҕарах» — Николай Попов, «2-с Баҕарах» — Сайнаара Христофорова, «Агрогородок» — Алексей Осипов, «Малгин» — Александра Ефимова, «Алаас» — Акулина Пестерева, «Сардаҥа» — Клара Захарова, «Моисеевка» — Герман Иванов этии киллэрбиттэрэ. Нэһилиэнньэттэн үп-харчы хомуллан, 2019 сылга үлэ саҕаламмыта.
Хатастар түмсүүлээхпит манна көстүбүтэ. Субуотунньуктарга Хатас тэрилтэлэрин эр дьоно ыҥырыыны ылынан, ньиргиччи үлэлээбиттэрэ.
Быйыл ити үлэбитин салҕаан, ытыктыыр убаастыыр, тумус туттар дьоммут утум ситимнэрэ (оҕолоро, сиэннэрэ) Стручковтар, Андреевтар, Баишевтар, Керегяевтар, Дьяконовтар, Константиновтар, Решетниковтар харчынан көмөлөһөн, күн бүгүн ол үлэ түмүктэннэ.
Тэрээһиҥҥэ дьон-сэргэ кыттарын интэриниэттэн билэн, Эмиэрикэҕэ олорор кыыспыт Виктория Шилова эмиэ кыттыста. Пааматынньыкка барыта 235310, 00 солк. хомулунна, онтон 78150,00 солк. — ытык дьоммут хаан-уруу сыдьааннарыттан. Аны манна босхо оҥоһуллубут көтүрүү, сыбааркалааһын, тутуу, илдьии-аҕалыы, тэлгэтии үлэлэрин холбоотоххо, бу хамсааһын уопсай сыаната 400000 тахса солкуобай буолар. Онон, хатастар, хас биирдии манна кыттыбыт, үлэлээбит, харчынан кыттыспыт киһи, бары киэн туттуҥ, үөрэ-көтө кэпсээҥ – Хатас дьоно түмсүүлээх, сомоҕолоһуулаах!
Ити курдук, «Норуот күүһэ — көмүөл» тосхолунан салайтаран, Хатас нэһилиэгин олохтоохторо сыл аайы Улуу Кыайыы күнүгэр Саллаат пааматынньыгар кэлэн уоттаах сэрии кыттылаахтарыгар сүгүрүйүөхтэрэ.
Елена ПОТОЦКАЯ, «Саха сирэ» хаһыат, edersaas.ru
Хааотыска — Наталья Руфова тиксэриитэ.