Үгэс курдук, Хатаска ааспыт сыл түмүктэринэн бастыҥнары быһаарар, махталы биллэрэр тэрээһиннэр ыытыллыбыттара. Ол эбэтэр, ‘’Көмүс кынат’’ бириэмийэни туттарар дьоро киэһэ быйыл үһүс төгүлүн ‘’Тускул ‘’ Култуура киинигэр тэриллибитэ.
edersaas.ru
Дьэ, бастыҥтан бастыҥнар, чулууттан чулуулар кимнээҕий?
Номинациялар:
“Сыл бастыҥ түмсүүтэ”— ‘’Утум иис’’ (сал. Анна Пестерева).
Бу түмсүү — “Тускул” култуура киинин иһинэн норуот айымньытын сайыннарар түмсүүлэртэн (сал. Т. Г. Жиркова) биир бастыҥнара, таһаарыылаах үлэлээхтэрэ. “Утум иистэр” кэлин, икки-үс сыл иһигэр утаппыттыы үлэлээн, төрүт иис сайдарын туһугар киэҥ хардыылары оҥордулар. Манна баһыйар үгүс өттүлэрэ иистэнэр баҕа санааларын сүрэхтэригэр бигээн илдьэ сылдьыбыт, ол эрээри, урукку өттүгэр элбэхтик тикпэтэх дьон. Салайааччылара Анна Петровна айылҕаттан бэриллибит талаана арыллан, сайдан, өссө атын дьону уһуйан, үөрэтэн, билиитин-көрүүтүн үллэстэн көрүөхтэн кэрэ үлэлэр дэлэйдэр.
“Сыл бастыҥ бырайыага” — “Күтүөт” уус-уран киинэ.
Режиссёр Евдокия Семенова, оператор Валентин Чепалов. Киинэҕэ тыйаатырбыт артыыстара Андрей Малышев, Иван Жирков, Владимир Петров, Наталья Нохсорова, Мария Христофорова, Станислав Федоров, Сардаана Кириллина, Айна Федорова, Клара Захарова, Саргылаана Петрова, Станислав Прокопьев, Харитон Семёнов уо. д.а. саҥа ааттар, талааннар арылыннылар, көрөөччүлэр биһирэбиллэрин ыллылар.
«Сыл бастыҥ салайааччыта» — Татьяна ОКОРОКОВА.
Татьяна Григорьевна үс сааһыттан күн бүгүҥҥэ диэри сценаттан түспэт ырыаһыт. Билигин сүүһүнэн киһини, оҕону ырыа ыллам эйгэтигэр киллэрэн, сыр-
дыкка, кэрэҕэ уһуйар. Бу үлэтигэр кэккэ улахан ситиһиилэрдээх, үрдүк үрдэллэрдээх.
“Көмүс бөрүө» — Оксана ГАВРИЛЬЕВА-АЙСААНА.
Дьэ, чахчы дэгиттэр талаан Оксана Павловнаҕа бэриллибит. Санаан көрүҥ, педагогическай билим хандьыдаата, бастыҥ учуутал, СӨ Суруйааччыларын сойууһун чилиэнэ, быысыбайдьыт, уруһуйдьут, оҕуруотчут, массыынаны ыытар, араас сирдэринэн айанныыр.
“Бастыҥ сырдатааччы” — Наталья РУФОВА, пресс-сэкирэтээр.
“Бастыҥ уһуйааччы” — Светлана МАКАРОВА.
Светлана Михайловна Хатаска художественнай кылаас аһыллыаҕыттан дириҥ хорутуулаахтык үлэлээн ситиһиинэн ситимнэнэр, сатабылынан сайыннарар, бэйэҕэ эрэли үөскэтэр, сайдар-үүнэр суолга үктэннэрэр. Кини үөрэнээччилэрэ анал үөрэҕи бүтэрэн, үөрэхтэрин үрдэтэн олохторун суолун буллулар. Элбэхтэн аҕыйаҕы эттэххэ, Акулина Шелковникова Москваҕа Строганов аатынан академияны бүтэрдэ, Анна Ефремова ХИФУ бүтэрэн, идэтинэн ювелирнай хайысхаҕа үлэлиир, Нарыйа Корякина художественнай училище кэнниттэн ХИФУ-га үөрэнэр уо. д.а.
“Ситиһии” — Екатерина ЕГОРОВА.
Екатерина Павловна художественнай кылааска, художественнай училищеҕа үөрэппит учууталларын эрэллэрин 100% толоро сылдьар сэмэй, ол эрэн, ылсыбытын ыһыктыбат, туппутун бырахпат, сыалын-соругун хайаан да ситиһэр идэлээх буолан, үөрэтэр оҕолоро Арассыыйа таһымыгар тиийэ ситиһиилэрдээхтэр.
Кини сөбүлүүр дьарыга да чуумпу, наҕыл, нууччалыы ханарытан эттэххэ, “чуумпу булчут”: тэллэйдьит бэрдэ, илиитин сылааһынан, тарбаҕын талаанынан уонунан киилэни уйар уйуктаах корзиналары хаһыатынан оҥорор.
“Сүрэх сылааһа” — Виталий АНДРОСОВ дьиэ кэргэнэ.
Бу бириэмийэҕэ саха санаалаах, ырыа куттаах дьон эрэ буолбакка, бүтүн норуот таптала, махтала Виталий Тимофеевич айымньыларынан суруллубут ‘’Үйэлээх тапталым’’ мюзикл төрүөт буолла. Виталий Андросов кэргэнэ, олоҕун аргыһа Октябрина Иннокентьевна харда тылыгар “Тускул” кэлэктиибигэр дириҥ махталын тириэртэ уонна анал бириистэри туттартаата, салгыы бииргэ үлэлэһэргэ бэлэмин биллэрдэ.
“Бастыҥ спонсор” — Валентин СОРОВ уонна Хатастааҕы сибиинньэ иитэр комплекс (салайааччы Роман Дмитриев).
Кинилэр — мэлдьи көмөлөһөргө бэлэм, өрүү биһиги сайдыыбытыгар, үүнүүбүтүгэр кыттыгастаах үтүө санаалаах дьоммутуттан уонна тэрилтэлэрбититтэн биир бастыҥнара.
“Кэрэ кэскил” — Мая ДЕГТЯРЕВА.
Аныгы олоҕу кытта тэҥҥэ хардыылаан иһэр иис сахалыы тыынын ыһыктыбатыгар ис сүрэҕиттэн кыһаллан үлэлиир уонна бу хайысхаҕа кэккэ ситиһиилэрдээх, билиитин-көрүүтүн кэҥэтэр, үөрэнэргэ, үөрэтэргэ мэлдьи бэлэм сырдык сыдьаай — Мая Захаровна.
“Интэриниэт ситимин сулустара” — киинэ тыйаатырын рекламатыгар уһуллубут Павел ПЕСТЕРЕВ, Александра ПРОКОПЬЕВА, Саргылаана ПЕТРОВА.
75000 киһи ‘’лайк’’ туруоран, Хатас аатын киэҥ эйгэҕэ ааттаттылар.
“Үйэтитиигэ бастыҥ үлэ” — “Аргыс” бибилэтиэкэ.
Евдокия Егорова, Мария Никифорова, Эжанна Алексеева диэн үлэһиттэрдээх “Аргыс” — туруу үлэһит, киэҥ далааһыннаах, үйэлээҕи үөскэтэр, ааспыты антах анньыбат, буолбуту умуннарбат дьоҕус кэлэктиип. Кинилэр сыралаах үлэлэринэн бибилэтиэкэ И. Д. Панаев аатын сүгэр, өссө быйыл кини туһунан дьоһуннаах кинигэ таһаардылар.
Дьэ, онон, биир дойдулаахтарбыт, кинилэри сэргээҥ, киэн туттуҥ.
Наталья РУФОВА, “Саха сирэ”, edersaas.ru саайтка анаан