Хатастар бастыҥ ыалларын чиэстээтилэр

Ааптар: 
Бөлөххө киир:

Хатас нэһилиэгэр таптал, дьиэ кэргэн уонна эрэллээх  буолуу күнүгэр «Эрэллээх уонна үйэлээх таптал» мэтээлинэн наҕараадаламмыт ыаллары чиэстээтилэр.

edersaas.ru

Бу туһунан Хатастааҕы «Тускул» киин иһинэн үлэлиир уопсастыбаннай тэрилтэлэри сүрүннээччи Наталья Руфова кэпсиир:

Олохтоох дьаһалта баһылыга Евгений Пермяков нэһилиэк бары олохтоохторун аатыттан Хатас бастыҥ ыалларын эҕэрдэлээтэ.

Петр Анатольевич, Агафья Поликарповна Баишевтар Сэргэлээххэ устудьуоннуур сылларыттан күн бүгүҥҥүгэ диэри бииргэлэр. Руслан Николаевич, Татьяна Александровна Павловтар оҕо иитиитигэр тус кылааттарын киллэрбит дьиэ кэргэн. Нэһилиэк уопсастыбаннай олоҕор мэлдьи инники күөҥҥэ сылдьаллар. Егор Иванович, Надежда Геннадьевна Пермяковтар эдэр саас эрчимин, кэрэ күннэрин аатырар-сураҕырар үлэлээх-хамнастаах «Хатас» сопхуоһугар тыа хаһаайыстыбатыгар күргүөмнээх үлэни кытта дьүөрэлээбит дьиэ кэргэн.   Николай Гаврильевич, Федора Семёновна Корякиннар дьиэ кэргэн холобуругар бу билиҥҥи олоххо сүрүн үлэни кытта атын дьарыгы тэҥҥэ сатабыллаахтык дьүөрэлээтэххэ, дойду үрдүнэн буола турар кириисис тимир ытарчатыгар ылларбакка олоруохха сөбүн көрөбүт. Мира Викторовна, Борис Юрьевич Андреевтар дьиэ кэргэннэрин олоҕо бииргэ буоллахха, өйдөһүү — өйөһүү көмөтүнэн олох араас моһоллорун уйуохха сөбүн чуолкай көрөбүт. Афанасий Николаевич, Виктория Васильевна Матвеевтар «эн-мин» дэһэн олорбуппут бэлиэр отут үс буола охсубут эбит!» диэн соһуйаллар. Кырдьыга да, этэҥҥэ олордоххо  сыл — хонук. Вячеслав Михайлович, Екатерина Ивановна Климовтар  »Мой адрес Советский Союз» диэн ырыаҕа ылланар кэм саҕана дьиэ кэргэн буолбуттара. Ол курдук, Вячеслав Михайлович сулууспалыы кэлэн баран, таптал долгунугар уйдаран, истиҥ иэйиитигэр бигэнэн, уон оҕолоох Шепелёвтар дьиэ кэргэттэригэр күтүөт буолан киириэҕиттэн субу бу күҥҥэ диэри Хатаһы иккис дойду оҥостон олорор. Сергей Михайлович, Александра Дмитриевна Ивановтар дьиэ кэргэн буолууларыгар Сергей Михайлович харса суох санаатын киллэрэн дьиэ иһэ толору оҕо-уруу Никифоровтар дьиэлэрин ортотугар баар буола түһэн баран дьиэ үлэтин оҥоро сылдьар Шуратыгар «миэхэ кэргэн буол» диэбититтэн саҕаламмыта эмиэ отучча сыл буолбут.

Наҕараадаламмыт дьиэ кэргэттэр бары оҕолоро олохторун суолун булбут дьон, талбыт идэлээхтэр, сөбүлүүр үлэлээхтэр, үксүлэрэ бэйэлэрэ оҕолоохтор. Бу аҕыс ыалтан алтатыгар ийэлэр доруобуйа харыстабылыгар үлэлииллэр. Онон Хатас балыыһата дьиэ кэргэн бэлиитикэтигэр  улахан кылааттаах диэтэххэ, омун буолбат.


Дьоллоох дьиэ кэргэннэргэ уйгулаах олоҕу, кытаанах доруобуйаны баҕарабыт.

Елена ПОТОЦКАЯ, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0