Маны аах Уопсастыба

Хатаска ыраастаныы ыйа тэрээһиннээхтик ыытыллар

Бииргэ буолуу, сомоҕолоһуу, бэйэ-бэйэни өйөнсүү-өйдөһүү парааттаан хаамыы эрэ буолбатаҕын туоһутунан субуотунньук буолар. Субуотунньук куруутун саамай наадалаах, тоҕоостоох түгэннэргэ, күннэргэ-дьылларга тэриллэ.

Бүгүн Хатас бөһүөлэгэр «Сардаҥа» түөлбэ көхтөөх дьоно дьиэтээҕи түбүгү, дьиэни-уоту быраҕан туран, биир сынньалаҥ күнү нэһилиэкпит көстүүтэ үтүө буоларыгар, сылдьар ыырбыт ырааһырарыгар субуотунньукка анаатылар. Үлэ сарсыарда уон чаастан саҕаланна. Бары да билэрбит курдук, сардаҥалар территорияларыгар «старай конечка», «күөх эрэстэрээн», «Халанча» биэрэгэ, «Ремикс» маҕаһыын тулата киирэллэр. Дьэ, этэргэ дылы, бэйэ кэнниттэн кэннини хайыһан көрбөт буолуу диэн хартыыната, айылҕаҕа сыһыан сатарайыыта, өй-санаа ыһыллыыта бу этиллибит сирдэргэ дьэҥкэтик көстөр. Ону бу түөлбэ дьоно-сэргэтэ кэккэ сылларга сыал-сорук туруорунан туран кэмиттэн кэмигэр хомуйар буоланнар, бу бүгүҥҥү күҥҥэ урукку сыллардааҕар лаппа аҕыйах куулу хомуйдубут диэн үөрэллэр.


«Сардаҥа» түөлбэ олохтоохторо — нэһилиэкпит уопсастыбаннай олоҕун тыгыалас тымырын тутан олорор сүрдээх оҥоруохха-тутуохха баҕалаах, көхтөөх дьон. Этэргэ дылы, ырыа диэтэххэ ырыа, үҥкүү диэтэххэ үҥкүү, тыйаатыр, үлэ-хамнас бастыҥнара, чөл, чэгиэн олох чаҕылхай холобурдара манна бааллар. Бэрт соторутааҕыта Нохсоороптор, Соровтар тустарынан суруйан турабын.
Бүгүҥҥү күҥҥэ дьиэ кэргэнинэн кыттыбыт Ольга, Олег Михайловтарга, Маргарита, Николай Андросовтарга, оҕолорун, куораттан кэлбит тастыҥ быраатын, балтын — Егоминнары мунньан халыҥ хамаандалаах Дария Герасимоваҕа, дьиэ кэргэнинэн сылдьыбыт Алеша Соломоновка, сиэннэрин кытта бэйэтэ биир биригээдэ дьонноох Марина Соломоноваҕа, манна даҕатан эттэххэ,  Марина Васильевна сиэнэ Кирилл бу субуотунньукка анаан куораттан кэллэ, Шура, Наталья Нохсороваларга, Саргылана Петроваҕа, Мария Казановаҕа, Ксенофонт, Амелия Ивановтарга, Максим, Данил Егоровтарга барҕа махтал буоллун.

Субуотунньукка оҕолор бааллара айылҕаҕа сыһыаҥҥа, ийэ дойдуга бэриниилээх буоларга, бэйэ-бэйэҕэ сыһыаҥҥа, ылбаҕай буоларга атыттарга үтүө холобур буолара мөккүөрэ суох. «Сардаҥа» түөлбэ саҥа талыллыбыт салайааччыта Николай Михайлович Андросов бу маннык тэрээһиннэргэ дьонун-сэргэтин кытта көрсөр-кэпсэтэр, инникини былааннаһар. Субуотунньугу тэрийээччилэртэн, көҕүлээччилэртэн биирдэстэрэ Марина Васильевна бэлиэтииринэн, оҕолор улаатаннар тутталлара-хапталлара, сатыыллара, кыайаллара-хотоллоро элбээбит, онон үлэлииргэ-хамсыырга да бэрт диир. Туох барыта ким эрэ көҕүлээһиниттэн, саҕалааһыныттан саҕаланар. Бу түгэҥҥэ Марина Васильевна Агафья Алексеевна Черноградскаяҕа махталлаах, кини: «Күннээҕи түбүккэ ыктаран умна быһыытыйдахха даҕаны кини «хайа хаһан?» диирэ олус үчүгэй», — диир.

Дьэ ити курдук, бүгүҥҥү күн «Сардаҥа» түөлбэ үтүө дьыаланан өйгө-санааҕа хаалар тэрээһини тэрийдэ.

Хатастан Н.Руфова.

0
0
Telegram Whatsapp