Хатаска ууга барар кутталлаах учаастактар боппуруостарын быһаарарга туруорустулар

Ааспыт сылга Хатас сэлиэнньэтин олоҕо-дьаһаҕа тупсарыгар элбэх үлэ ыытылынна. Ол иһигэр, куорат иһигэр киирэр «Хатас» массыына суолугар аспаал-бетон  ууруллан, айанньыттар, тырааныспардаах дьон абыраннылар.

Сыл устата сэлиэнньэҕэ Каландаришвили, Ойунуускай, С.Алексеев уулуссаларыгар уопсайа 4,2 килэмиэтир уһуннаах суолу өрөмүөннээтилэр. Молодежнай уонна С.Алексеев аатынан уулуссалары сырдаттылар. «Агрогородок» бүтэһик тохтобулга уонна «Балыыһа» тохтобулга (куорат диэки барарга) сылаас тохтобуллары оҥордулар.
2022 сылга суоллар салҕыы өрөмүөннэниэхтэрэ. Чуолаан элбэх оҕолоох ыалларга биэрбит учаастактарга киирэр суолу оҥоруу, Октябрьскай уонна Ленин уулуссаларын олохтоохтук өрөмүөннээһин былааннаналлар.
Олунньу саҥатыгар оскуолаҕа сыһыарыы тутуу саҕаланыаҕа.
Бу туһунан Дьокуускай куорат дьаһалтата Хатас нэһилиэнньэтигэр ыыппыт онлайн-отчуотугар этилиннэ.
Көрсүһүү кэмигэр олохтоохтортон ууга барар кутталлаах сир учаастактарын, тыа хаһаайыстыбатын сирин аналын уларытыы, элбэх оҕолоох дьиэ кэргэттэргэ сир учаастагын биэрии туһунан ыйытыылар хото киирдилэр.
Куораттан Хатаска сылдьар оптуобус маршрутун уларытыы, айан сыанатын, Баҕарах оройуонун инфраструктуратын, Каландаришвили 72 уонна Воинская 1, 1/1 уулуссаларга баар хаарбах дьиэлэртэн көһөрүү уо.д.а. боппуруостар болҕомтоҕо ылылыннылар.
Куорат уокуругун сиргэ сыһыаннаһыы агентствотын салайааччыта Акулина Друзьянова быһаарбытынан, Хатас сэлиэнньэтигэр биир тыһыынчаттан тахса сир учаастага ууга барар кутталлаах зонаҕа киирсэллэр.
Киирбит ыйытыылар уонна этиилэр көрсүһүү боротокуолугар суруллан, атын анал структураларыгар уонна куорат думатыгар бэриллиэхтэрэ.

Надежда ЕГОРОВА, «Саха сирэ», edersaas.ru