Бүгүҥҥүттэн, муус устар 13 күнүттэн, Хатаска элбэх оҕолоох ыалларга бэриллибит учаастактарга гаас ситимин тардыы саҕаламмыт. Ол туһунан «Сахатранснефтегаз» АУо генеральнай дириэктэрэ Алексей Колодезников Дьокуускай куорат мээрэ Евгений Григорьевтыын Хатаска тиийэн кэпсэтиигэ эттэ.
«Кэккэ учаастактарга гаас ситимэ тиэрдиллэ илигиттэн дьон дьиэлэрин тутта сатаабаттар. Бу күннэртэн 14-с, 15-с, 16-с микрооройуоннарга тустаах үлэни тэрийиэхпит«, —— диэн Алексей Колодезников быһаарар. Мээр Евгений Григорьев бүгүҥҥү күҥҥэ 50 ыал гааһы холботторууга сайабылыанньа биэрбититтэн аҥаардара социальнай гаастааһыҥҥа хапсалларын туһунан иһитиннэрдэ. Социальнай гаастааһын бырагырааматыгар хапсарга сүрүн ирдэбилинэн учаастак уонна дьиэ ыал бас билиитигэр баарын туһунан регистрацияламмыт буолуохтаах.
«Дьокуускай куоракка тустаах бырагырааманан 2022 сылга барыта 800 дьиэ учаастагар диэри гаас ситимэ тардыллара былааннаныллыбыта. Ону тэҥэ, 2023-2024 сылларга 300 дьиэ учаастагар диэри гаас ситимэ тиэрдиллэрэ ситиһиллиэҕэ», — диэн Евгений Григорьев быһаарар.
Александр Тарасов