“Россия ийэлэрэ” Саха сиринээҕи салаата Саха сиригэр соҕотох технопарканы толкуйдаабыт. Итиэннэ “Саха сирин эдэр дьоно” («Юные якутяне») оҕо технокуората диэн ааттаабыт. Бырайыагы салайааччы Прасковья Борисова ЮНЕСКО штаб-квартиратыгар тиийэн билиһиннэрдэ.
Бу ый саҥатыгар Саха сирин биэс киһилээх бөлөҕө Парижка ЮНЕСКО Штаб-квартиратыгар сектордарынан баран үлэлээн кэллэ. Кинилэр кэккэлэригэр «Россия ийэлэрэ» общественнай хамсааһын Саха сиринээҕи салаатын бэрэссэдээтэлэ Прасковья Борисова сырытта. Кини онно “Саха сирин эдэр дьоно” («Юные якутяне») оҕо технокуоратын бырайыагын билиһиннэрдэ.
Бырайыак научнай-техническэй хайысхалаах буолара былааннанар. Хатас сэлиэнньэтигэр баар уруккута специализированнай оскуола (13 гектар иэннээх) сирин-уотун көрбүттэр. Гаас, уу, уот барыта баар. Онон материальнай базатын хаҥатан үлэлиир былааннаахтар.
Прасковья Борисова: “Манна ыарахан олохтоох-дьаһахтаах, кыра дохуоттаах, элбэх, инбэлиит оҕолоох дьиэ кэргэн оҕолорун кытта кэлэн дьарыктанар кыахтаныахтара. Республикаҕа соҕотох улахан автодрому (картинг трассата, 3 D лаборатория, робототехника, мехатроника, авиамоделирование, автомоделирование, судомоделирование уо.д.а.) тэрийиэхпит. Маннык уопут Гамбург (Германия) куоракка уонна Казахстаҥҥа баар эбит. Кинилэртэн сүбэ ылыах буоллубут. Ону сэргэ эбии үөрэхтээһиҥҥэ дьиэ кэргэн кулуубун тэрийэр баҕа санаалаахпыт. Оҕолор төрөппүттэрин кытта дьарыктаналларыгар тимир, мас уустарын, иис араас көрүҥүн сыахтара арыллыаҕа. Бу, кыһыннары-сайыннары үлэлиир паарка оҕолор иннитин идэлэрин таба тайаналларыгар уонна төрүт дьарыкпыт сүппэтин туһугар улахан кыаҕы биэрэригэр бүк эрэнэбит. Билиҥҥитэ концепция торума баар. Бырайыагы 2017-2018 сыллартан саҕалаан, түһүмэхтэринэн олоххо киллэрбитинэн барыахпыт. Итиэннэ ЮНЕСКО статуһун ыларга үлэлэһэбит”, – диэн иһитиннэрдэ.
Людмила ПОПОВА.