П. Н. и Н.Е. Самсоновтар ааттарынан Хатастааҕы орто оскуола иһинэн үлэлиир «Агрокубка» сылы эргиччи дьэдьэн, тюльпан, петуния, роза, гиоцин уо.д.а. кэрэ сибэккилэр үүнэллэр.
edersaas.ru
Агротехнология хайысхатыгар дириэктэри солбуйааччы Диана Дмитриевна Васильева туох сонун үлэ-хамнас ыытылларын билиһиннэрдэ:
— Биһиги лабораториябыт биотехнология, агробиотехнология уонна робототехника диэн үс хайысханан үлэлиир. Бу хайысхаларынан үөрэнээччилэр бырайыактыыр үлэнэн дьарыктаналлар, бырайыактарынан научнай-практическай кэмпэриэнсийэлэргэ кыайаллар.
Биотехнология лабораториятыгар үлэһиттэр күһүҥҥү каникул кэмигэр лаборатория ыраас зонатын өрөмүөннээбиттэрэ, билигин манна үөрэнээччилэр үүнээйилэр клоннарын оҥороллор. Үүнээйилэр ыарыыларын уонна кинилэри буортулааччылары үөрэтэллэр, химиичэскэй анаалыстары боруобалыыллар. Үүнээйилэри икки сылга микроклональнай элбэтии түмүгэр пробиркаҕа олордуллубут бастакы үүнээйи аһын ыллылар.
Онтон агробиотехнология лабораториятыгар оҕолор маастардары кытары үүнээйилэри, сэппэрээктэри, дьиэтээҕи сибэккилэри элбэтэллэр, салаакка аналлаах араас күөх үүнээйини олордоллор.
Билигин 10-с кылаас үөрэнээччилэрэ Айуол Окороков уонна Александр Асекритов үүнээйигэ биологическай эбилиги оҥорорго үлэлэһэллэр. 11-с кылаас үөрэнээччитэ Лиана Гуляева BEAUTYKUB эбиликтээх мыыла кэллэксиэйэтин, 9-с кылаас үөрэнээччитэ Сахалина Евсеева соботтон бакыаттаах миини, 7-с кылаас үөрэнээччилэрэ Павел Марков уонна Саша Оконешников отонтон түргэнник суураллар суогу оҥордулар. Алина Бурцева уонна Каролина Петрова эт бородууксуйаларын араастаан оҥороллор, ону таһынан «Фито-лед» биисинэһи толкуйдууллар.
Оҕолор өссө биир сөбүлүүр роботехникаларыгар бэйэлэрэ автоматизированнай гидропоннай тэриллэри бэлэмнииллэр. Онно клубника, дьэдьэн силигилии үүнэллэр. Араас оонньууну толкуйдууллар, моделированиенан дьарыктаналлар уо.д.а.
«Агрокуб» оҕолоро атыттарга сүбэ-ама буолаллар, араас күрэхтэр, олимпиадалар кыайыылаахтара.
Оскуола 2020-2021 үөрэх дьылын түмүгүнэн «Топ 100 школ России по движении WorldSkills Russia juniors» киирбитэ.
Сэбиэскэй кэмҥэ өрөспүүбүлүкэбит киин куоратын, атын да улуустары күөх үүнээйинэн, оҕуруот аһынан, эт-үүт бородууксуйатынан хааччыйан олорбут Хатас дьонун ыччаттара, оҕолоро кинилэр үтүө холобурдарын батыһан, аныгы олоххо сөптөөх, туһалаах хайысханы тутуһаллара хайҕаллаах.
«Саха сирэ», edersaas.ru(Үөрэх управлениетын сайтыттан)