Бэҕэһээ, субуота күн, дьон өйүгэр-санаатыгар өргө диэри хаалар бэртээхэй тэрээһин буолан ааста.
edersaas.ru
Сомоҕолоһуу сылынан сибээстээн хатастар үтүөкэн ыччат дьоммут — 757018 такси сулууспатын үлэһиттэрин: Анастасия Никифорова, Елена Петрова, Егор Колосов, Екатерина Канаева уонна дьоһун сааска үктэммит, саҥа буолартан саллыбатах, атын буолары атыҥыраабатах, үҥкүү тэтимин тупсарар албастарын булбут Афанасий Калачёв курдук уопсастыбаннай үлэҕэ көхтөөх дьон айар киэһэлэрин тэрийдибит.
Афанасий бэйэтин сатабылын, билиитин-көрүүтүн Ис дьыала министиэристибэтин бэтэрээннэрин ырыа-үҥкүү »Созвездие » ансаамбылыгар аныыр. Бу тиритиилээх-хорутуулаах, көлөһүн тохтуулаах, сэниэ бараныылаах, өй-санаа күүрүүлээх уопсастыбаннай үлэни кини буор босхо ыытар эбит. Дьэ, чахчы да талбыт идэҕэ бэриниилээх буолуу, дьону-сэргэни убаастааһын үтүө холобура! Ансаамбыл үлэлээбитэ баара-суоҕа икки эрэ сыл буолбут эрээри, үҥкүүһүттэр толорор маастарыстыбаларын таһыма олус үрдүгүнэн, үҥкүүтэ элбэҕинэн сөхтөрдө.
Баҕалаах уонна тулуурдаах-дьулуурдаах буоллахха, дьаныһан туран дьарыктаннахха, ситиһии сиэттиспитинэн, кыайыы кыттыспытынан барарын бу ансаамбыл нөҥүө илэ-чахчы итэҕэйдибит. Ол курдук, «Саха» НКИХ «Үҥкүүлээ» бырайыагын биэтэгэр диэри тиийэн, дьону-сэргэни сөхтөрөн, астыннаран турар. Бу бырайыак киһи сааһыттан тутулуга суох, олоҕун хайа да кэрдиис кэмигэр тэтимин ыһыктыбакка, чөл, чэгиэн буолуон сөбүн көрдөрдө. »Созвездие» ансаамбылга бэтэрээннэр нэдиэлэҕэ үстэ дьарыктаналлар эбит. Бу киэһэ Афанасий биир дойдулаахтарыгар илии тутуурдаах, бэлэхтээх кэлэн соһутта да, үөртэ да. Ол курдук, 4 тэрилтэҕэ бэйэтин 10 күннээх үөрэҕэр сэртипикээт туттаран ыҥырда. Аны көрөөччүлэрин минньигэс тордунан күндүлээтэ.
Анастасия Никифорова (Слепцова) дьону таһар сулууспата эмиэ кэһии бөҕөлөөх. Кини такситын өҥөтүнэн туһанааччыларга Саҥа дьылы көрсө өйдөбүнньүк бэлэҕэ-туһаҕа: харыйа оонньуура, киэргэлэ, иһит-хомуос, босхо айан сэртипикээтэ үгүөүөн! Уонна… суотабай төлөпүөн туттарда! Суотабайы үлэ бэтэрээнэ, норуот маастара, «Утум иис» холбоһук бастыҥ иистэнньэҥэ Анна Ефимова бэлэхтэтэн, үөрэн-көтөн барда.
Анастасия бэйэтин тула биир санаалаахтарын мунньан, иилээн-саҕалаан оҕо эрдэҕинээҕи дьүөгэлэринээн Елена Петровалыын,Екатерина Канаевалыын, бииргэ үөрэммит Александр Соловьевтуун, үөлээннээҕинээн Егор Колосовтуун сүүрдэр таксилара аҕам саастаахтарга, элбэх оҕолоохторго, доруобуйаларынан хаарчахтаахтарга чэпчэтиилээх буолан, кинилэргэ тустаах дьон махталлара сүҥкэн.
Бу курдук, уопсастыбаннай тэрилтэлэр бэйэбит үлэбитин, актыыбынай уопсастыбанньыктарбытын өрүү билиһиннэрэ олоробут.
Наталья РУФОВА,
Хатастааҕы «Тускул» Култуура киинин иһинэн үлэлиир
уопсастыбаннай тэрилтэлэр үлэлэрин сүрүнннээччи.
«Саха сирэ» хаһыат, edersaas.ru саайка анаан.