Тыйаатыр ускуустуба биир саамай кырдьаҕас уонна хайа да кэмҥэ, хайа да дойдуга суолтатын сүтэрбэтэх уонна сүтүө да суохтаах көрүҥэ буолар.
Хатас нэһилиэгэ норуодунай тыйаатырдааҕа — бу нэһилиэкпит култууратын тэрилтэтин салайааччыларын, чуолаан СӨ култууратын үтүөлээх үлэһиттэрэ Людмила Михайловна Чепалова, Вера Никтична Старкова өҥөлөрө.
Күн бүгүн тыйаатыр «Тускул» Култуура киинин дириэктэрэ Валентин Азотович Чепалов, режиссер Евдокия Ефимовна Семенова салайыытынан үлэлиир. Ол курдук, быйыл 24 төгүлүн айар-тутар сезонугар номнуо иккис премьератын кулун тутар 20 күнүгэр көрөөччү дьүүлүгэр таһаарда. Сэтинньигэ улуу Өксөкүлээх Өлөксөй үйэттэн ордук анараа кэмҥэ суруллубут эрээри, бэйэтин тоҕоостоох түгэнин күн бүгүн да ыһыктыбатах «Куорат кыргыттара» айымньытын туруорбута. Онно сүрүн уратыбыт тыыннаах муусука доҕуһуола этэ. Ол туһунан элбэхтэ суруллубута, сырдатыллыбыта.
Билиҥҥи премьера уратытынан СӨ Алампа аатынан бириэмийэ лауреата, драматург Дмитрий Федосеевич Наумов «Гибернация» диэн айымньытын икки толору састаабынан икки испэктээк туруута буолла. Бу көстүүнү тыйаатырбыт састааба кыаҕын, баҕатын, дьоҕурун, сайдыытын дакаастабыла дии саныыбыт. Баҕатын диэн түбэһиэхчэ суруйбатым – тыйаатыр билиҥҥи састаабын артыыстара — оонньуурга, бэйэ олоххо көрүүтүн сыана нөҥүө этэргэ бэлэмнэр. Кинилэр ортолоругар уопуттаах араас хабааннаах оруолу оонньообуттар бааллар, эбэтэр бэйэтин холонон көрөөччү да баар, эбэтэр кэккэ сылларга киһи хараҕар быраҕыллардыы сайдар-үүнэр да баар. Уопуттаах артыыстарбыт Андрей Малышев, Владимир Петров, Наталья Нохсорова, Евдокия Степанова, Николай Иванов Саргылана Григорьева кэллилэр да хайдах эрэ оннугар түһүү, бэрээдэктэнии, айымньыга сыһыан дириҥии, суолтата улаата түһэр. Орто көлүөнэ Алексей Осипов, Саргылана Петрова тус бэйэ көрүүтүн киллэриигэ маастардар, Станислав Федоров тылы-өһү түргэнник-тарҕаннык өйдүүрүнэн, араас хабааннаах оруолга киирэринэн, Станислав Прокопьев ордук хамсаныы, көрүү-истии өттүгэр, Валентина Исакова, Саргылана Ефремова, Андрей Саввин, Аргентий Налыйдыров баар балаһыанньаҕа киирэллэринэн, лоп-бааччы Саргылана Сивцева тыла-өһө чуолкайынан, куолаһа чөллөркөйүнэн. Кыра оҕо эрдэҕиттэн кулууп араас тэрээһиннэригэр куруутун баар Артур Соловьев хаһан да буоларын курдук көхтөөх. Бу испэктээккэ саҥа сирэй, сонун көрүү — Анна Удина буолла.
Ханнык баҕарар испэктээккэ реквизит бэйэтэ туһугар тус аналлаах оруоллаах. Дьэ бу манна биһиги, хатастар, уҥа-хаҥас көрбөккө бэйэбит талааннаах, дьоҕурдаах дьоннордоохпут олус үчүгэй. Бу сырыыга Андрей Малышев, Владимир Ефремов, Николай Попов көмөлөстүлэр. Үҥкүүлэри Дайаана Иванова туруорда, уот-күөс өттүн Алексей Иванов. Испэктээк режиссера Евдокия Семенова, режиссер көмөлөһөөччүтэ Наталья Руфова.
Этиллибитин курдук, икки састаап, икки тус туһунан көрүү, тус туһунан сыал-сорук буолан тыла-өһө биир эрээри, олох атын атын буолан бириэмэ барбытын билбэккэ да хааллылар. Бүтүүтүгэр хас биирдии артыыһы сылаас ытыс тыаһынан көрсүбүттэрэ долгутуулаах да, үөрүүлээх да буолла.
Премьера кэнниттэн анал үөрэхтээх, ураты көрүүлээх Егор Пеньков уонна Сунтаар улууһун Дьаархан нэһилиэгин кулуубун салайааччыта биһигини кытта бииргэ үлэлэһэр сүбэлэтэр да, сүбэлиир да биир идэлээхтэрбит санааларын үллэһиннилэр.
Тыйаатыры кытары аныгыс көрсүһүү муус устар 2 күнүгэр буолуоҕа. Ким көрбөтөх онно кэлэргитигэр ыҥырабыт. Бу күн өссө Чурапчы, Амма, Горнай, Бүлүү, Нам, Хаҥалас улуустарын норуодунай тыйаатырдара кэлэн эмиэ бу испэктээги көрдөрүөхтэрэ.
«Саха сирэ», edersaas.ru сайтка анаан Наталья РУФОВА