Нэһилиэк түмэлин түбүктээх үлэтин биир күнэ.
2021-22 сс. айар-тутар сыл саҕаланыытыгар 2021 сылга Куорат күнүгэр Хатаспытыгар күүтүүлээх үтүөкэн сонун тилийэ сүүрбүтэ. »Музей аһыллыбыт» диэн. Олохтоох дьаһалта уонна «Тускул» КК дириэктэрэ Чепалова Л.М. сүбэлэһэн баран түмэлгэ салайааччынан үлэлээ диэн П.А.Баишевы көрдөспүттэрэ. Үөрүөхпүт туһугар Петр Анатольевич толкуйдаан баран, сөбүлэммитэ. Дьэ ол күнтэн ыла дьиҥ үлэтин былаана диэн, хаһаайыстыбаннай боппуруостар диэн… Ититии систиэмэтэ томороон тымныыны тулуйарыгар үгүс элбэх сырата барда.
Онтон биһиги бүгүҥҥү күннээҕигэ түмэл, ХОО, «Тускул» КК буолан »Память каждого» диэн бырайыак чэрчитинэн, нэһилиэкпит түмэлин устуоруйатыгар маҥнайгы научнай-практическай кэмпириэнсийэ ыытылла турарын туһунан буолуо. Тэрээһин аата да этэринии хас биирдии киһи (сааһыттан тутулуга суох) сүрэҕэр, дууһатыгар илдьэ сылдьыахтаах дьоһун дьоммут-сэргэбит туһунан буолар. Ол ытыктабыллаах дьоммут дьоллоох олох туһугар охсуһууларын, сэрии урусхалын кэннэ дойдуну чөлгө түһэриигэ холооно суох хорсун үлэлэрин-хамнастарын туһунан буолла. Конференция биир киһи кэрэхсиир, сэргиир уратытынан хас биирдии кыттааччы үлэтэ хомуурунньук буолан тахсан кыттааччыга уонна түмэлгэ бэлэх буолан бэриллэр!
Дьүүллүүр сүбэҕэ Баишев Петр Анатольевич, Роман Владиславович Обоюкин, Павлова Татьяна Александровна, Александр Львович Антонов үлэлээтилэр.
Павлова Т.А.: — Сүрдээх үчүгэй уонна наһаа наадалаах тэрээһин буолан ааста. Сахабыт сирин араас улуустарыгар сэрии саҕана оҕо-аймах улахан дьону кытта тэҥҥэ үлэлээн- хамсаан, аччык аас-туор олоҕу олорбуттарын кырачаан дакылаатчыттар лоп-бааччы, чуолкайдык саҥаран кэпсээтилэр. Анастасия, Иван Татариновтар кыргыттарыттан биирдэстэрэ ийэтинэн эбэтин Зинаида Громова, биирдэстэрэ аҕатынан эһэтин И.Татаринов туһунан биир да тылга иҥнибэккэ кэпсээбиттэрэ истэргэ да, көрөргө да, ылынарга да олох үчүгэй, долгутуулаах. Кыргыттар оҕо уһуйаанын иитиллээччилэрэ. Ини-бии Илья Назаров, Артём Васильев хос эһэлэрин, баара буоллар быйыл 100 сааһын туолуохтаах А.Д.Андреев туһунан ылыннарыылаахтык кэпсээтилэр уонна түмүгэр эһэлэрин туһунан кинигэни нэһилиэк түмэлигэр бэлэх туттардылар. Р.Павлов аҕатынан аймахтара Черноградскайдар тустарынан биирдэ да кумааҕытын кыҥастаспакка сэһэргээтэ. Кэпсиир матырыйаалын олох үчүгэйдик үөрэппитэ, билэрэ киһи эрэ истэ олоруох курдук. Бииргэ төрөөбүт Чемерзанскайдар эмиэ ылыннарыылаахтык, сорунуулаахтык кэпсээтилэр. Оҕолору бэлэмнээбит төрөппүттэргэ, учууталларга, бу тэрээһини тэрийэн ыытааччыларга дойдуга бэриниилээх буолууга туһуламмыт үлэҕэ кылааттарын иһин махталбын тиэрдиэм этэ. Тэрээһин уонна ыытыы хаачыстыбата үрдүк таһымнаахтык ааста. Бу манна кыттыбыппыттан сүрэхтиин үөрдүм, дууһалыын долгуйдум.Нарияна Стручкованы, Колымана Ларионова хамаанданан үлэлэрин бэлиэтиэм этэ. Үлэлииргэ усулуобуйа олох үчүгэй.
А.Л.Антонов: — Кэмпириэнсийэ сүрүн сыалын ситистэ дии саныыбын. Оҕолор кэпсии, кэпсэтэ, истэ үөрэнэллэр. Болҕомтолоох буолаллар. Күн аайы туттубат тылларын саҥараллар, тылларын баайа кэҥиир. Копырин Сулустаан, Реева Даша үлэлэрин бэлиэтиэм этэ. Кэмпириэнсийэ түмэлгэ буолбута эмиэ ураты тыын, ураты көрүү буоллаҕа дии.
Дьэ кырдьыга да оннук. Биһиги, тэрийээччилэр, сыалбыт-сорукпут туолбутуттан ис сүрэхтэн үөрэбит уонна эһиилги сылга кыттааччыбыт кылаас (үрдүкү кылаастар кэлиэхтэрэ диэн) өттүнэн эбиллэригэр эрэнэбит. Координатор Колымана Ларионова хаһан да буоларын курдук чуолкай, дьоһун, холку. Тэхиньиичэскэй өттүнэн «Тускул» КК хааччыйда. 90 сайаапка киирдэ, 80 үлэ кэпсэннэ. Эспиэрдэр олус таһаарыылаах үлэлэрин бэлиэтиибит уонна махтанабыт.
Кэмпириэнсийэ түмүгэ ыам ыйын 6 күнүгэр «Тускул» КК буолуоҕа. Онно хас биирдии кыттааччы бэлэх быһыытынан бу үлэлэр хомуурунньуктарын тутуоҕа.
Н.Руфова,
Хатас.
Хаартыскалар Н.Руфова тиксэриилэрэ