Айылҕаттан бэриллибит дьоҕур, талаан дьулуур, тулуур көмөтүнэн сатабыл үрдүк үктэлигэр үктэннэрэр. Ол сатабыл үллэстэри сөбүлүүр, бэрсэри биһириир, оччоҕо эрэ салгыы сайдыы аартыгын арыйар, турсуу суолун тутуһар диэн өйдөбүл чаҕылхай туоһута биһиэхэ Хатаска баар. Кини кимий? СӨ норуот илиитинэн оҥорон таһаарар айымньытын маастара, Хатас нэһилиэгин норуодунай маастара, СӨ култууратын туйгуна Малышев Андрей Лукич.
Быйылгы »Якутия мастеровая» диэн күүтүүлээх-кэтэһиилээх норуоттар икки ардыларынааҕы улахан далааһыннаах дириҥ силистээх-мутуктаах тэрээһин биир бастыҥнара буолбута. Онно ордук кини үөрэнээччилэрдээҕин, батыһыннарааччылардааҕын сэргээбиттэрэ. Бу күннэргэ кини төрөөбүт-үөскээбит төрүт буор дойдутугар Горнай улууһугар хас да нэһилиэккэ таһаарыылаахтык, үтүө түмүктээхтик үлэлээн кэллэ. Төрүт үгэспитин, сатабылбытын баҕалаах, дьоҕурдаах дьоҥҥо тириэртэ. Бары да билэрбит курдук Горнай улууһа мас уустара уһаналларыгар сөптөөх матырыйаалыгар тутахсыйбатах дойду. Бу сырыыга кытах оҥоһуутугар ыкса ылсан үлэлэстилэр. Үөрүөн-көтүөн, кынаттаныан туһугар баҕалаахтар да бааллар, тэрийээччилэр да бааллар. Дьиҥэ кини маннык тэрээһини өйүгэр-санаатыгар иитийэхтээбитэ ыраатта, ол араас биричиинэнэн кэлин диэҥҥэ ууруллан испит. Ол барыта ис иһиттэн, дууһатыттан ис турук тас туруктуун биир таһымҥа тахсан өй- санаа, эт-хаан тэҥҥэ хамсаан сылаанньыйыылаах сылайыы, дуоһуйуулаах уоскуйуу туругар киирэн сылдьар Андрей Лукичка өссө да үүнэр-сайдар аартыгын аана аһаҕас буоллун диэн баҕа санаабытын этиэҕиҥ.
Күндү ааҕааччым аах, сэргээ, салгыы кэпсээ.
Наталья Руфова, Хатас