Хатас оскуолатыгар — «Арассыыйа уонна Крым: биһиги бииргэбит» уруок буолла

Дьокуускайга А.Е.Кулаковскай аатынан норуоттар доҕордоһууларын дьиэтин үөрэтэр-методологическай киинэ  «Арассыыйа уонна Крым: биһиги бииргэбит» диэн уруогу Хатас орто оскуолатыгар кулун тутар 16 күнүгэр тэрийэн ыытта. Бу туһунан норуоттар доҕордоһууларын дьиэтин пресс-сулууспата иһитиннэрэр.

Тэрээһин Арассыыйаҕа Крым холбоһуутун алтыс сылыгар ананна. Уруогу норуоттар доҕордоһууларын дьиэтин үөрэтэр-методологическай кинин сүрүннүүр методист Айна Павлова ыытта.

9 «Б», 11 «А», 11 «В» кылаас үөрэнээччилэрэ Сэбиэскэй Сойуус кэмигэр Крым РСФСР сорҕото, екатерининскай кэмнэргэ култуура кииннэриттэн биирдэстэринэн буолбутун туһунан иһиттилэр.  Ону сэргэ, Айна Ивановна «Россия многонациональная» оонньууну ыытта. Оонньуу чэрчитинэн оҕолор Конституция, норуоттар үгэстэрин, сиэрдэрин-туомнарын, фольклордарын, национальнай оонньууларын  туһунан биллилэр. Сэһэргэһии чэрчитинэн дойдуларын туһунан билиилэрин-көрүүлэрин хаҥаттылар.

Крым 2014 сыллаахха кулун тутар 18 күнүгэр Арассыыйа састаабыгар киирбитэ. Бүгүн Крым экономиката тэтимнээхтик  сайдар.