Хатас хатан дьоно Бэрдьигэстээххэ тиийдилэр

Бөлөххө киир:

Сахабыт сирин уостан түспэт уратыларыттан биирдэстэринэн күн-дьыл көстүүтэ буолар. Биһиэхэ эрэ кыһын 60 кыраадыска диэри тыйыс тыыннаах тымныы, оттон сайын 30 тахса кыраадыс куйаас…

edersaas.ru

Дьэ, санаан кэбиһиҥ, бу кыраадыстар амплитудаларын… Төрүт дойдубут уратытын эппит-хааммыт, өйбүт-санаабыт кыайар буолан тулуйабыт. Бу күннэргэ сайыммыт оройугар дьиҥ чахчы сырылатар куйаас күннэр тураллар, кыра наадалаах киһи таһырдьа быкпат итиитэ. Күрэхтэһиэхтээҕэр, күөн көрсүһүөхтээҕэр буолуох хамсанар да ыарахаттардаах курдук.


Дьэ, маннык түгэҥҥэ, маннык кэмҥэ тулуур-дьулуур, олоххо баҕа, кытаанах санаа баар дьоно Горнай улууһун Бэрдьигэстээх нэһилиэгэр муһуннулар. Манна СӨ доруобуйатынан хааччахтаах дьонугар сүүрбэһис төгүлүн ыытыллар успуорт бэстибээлигэр 15 улуустан муһуннулар. Айан бөҕөтүн айаннаан, хомунан-тэринэн, күүстэрин-уохтарын мунньунан тиийдилэр. Манна даҕатан эттэххэ, өрөспүүбүлүкэбит салалтата сылын аайы үгүс элбэх үтүө тэрээһиннэри ыытар буолан, улуустарбытыгар ханнык баҕарар таһымҥа ыытыллар успуорт да, култуура да тэрээһиннэрин ыытарга усулуобуйа баара олус үчүгэй. Горнайдар былырыын Манчаары оонньууларын үрдүк таһымҥа ыыппыттарын бары да бэркэ билэбит.
Хаһан да буоларын курдук, хатастар онтон туора турбатыбыт. Ол туһунан «Саха» НКИХ кэрэспэндиэнэ, биир дойдулаахпыт Михута сэһэргиир:


«Үлэм чэрчитинэн ыытыллар тэрээһиннэргэ ханна да тиийдэхпинэ Хатас дьонун-сэргэтин хайаан да көрсөбүн. Бу да сырыыга оннук буолла. Андрей Анатольевич Петров уопсай тэрээһиҥҥэ, Константин Дмитриевич Гаврильев судьуйалааһыҥҥа, Туйаара Люминаровна, Василий Иванович Копыриннар, Павел Осипов Дьокуускай куорат хамаандатыгар киирэннэр кыттааччы быһыытынан кэлбиттэр. Тэрээһин аата да этэринии, успуорт, култуура бэстибээлэ буоларын быһыытынан, успуорт көрүҥнэрин (олорон эрэ волейбол, дартс, дуобат, хабылык, хаамыска уо.д.а) таһынан «Ийэ хотун» уонна «Эрчимэн Бэргэн» диэн күрэхтэрдээх».
Василийдаах Туйаара успуорт да өттүгэр кытталлар, култуура өттүгэр да бааллар. Онон, волейболга оонньуохтара, түөртүү түһүмэхтээх «Ийэ хотун», «Эрчимэн Бэргэн» диэн күрэхтэргэ кыттыахтара.


Тэрээһин үс күннээх. Бүгүн түмүк күн. Дьоммутугар ситиһиинлэри баҕарыаҕыҥ уонна олоххо дьулуурдарыгар, кытаанах санааларыгар сүгүрүйүөҕүҥ. Ох курдук оҥостон көрсүбүт, усулуобуйаны олохтообут Горнай улууһун дьонугар-сэргэтигэр барыбыт аатыттан махтаныаҕыҥ.

«Саха сирэ», edersaas.ru анаан Наталья РУФОВА

Ааптар хаартыскалара

+1
0
+1
0
+1
0
+1
0
+1
0
+1
0
+1
0