Соторутааҕыта Хатас сэлиэнньэтигэр “Хатас хамсааһына” диэн түмсүү тэриллибитэ. Кинилэр тэриллээт да, үлэлэринэн-хамнастарынан, үтүө дьыалаларынан номнуо дьонноругар-сэргэлэригэр биллэн эрэллэр. Ол курдук, ааспыт нэдиэлэҕэ Хатас сэлиэнньэтигэр турар “Дьоллоохтук айаннааҥ” диэн суругу чөлүгэр түһэрбиттэрэ, сэргэхсиппиттэрэ.
edersaas.ru
Онтон бүгүн “Хатас хамсааһына” түмсүү көҕүлээһининэн “Агрогородок” оройуонугар субуотунньук ыытылынна. “Агрогородок” түөлбэ эдэр да, эмэн да олохтоохторо биир киһи курдук тахсан, оптуобус бүтэһик тохтобулугар баар стеланы кырааскалаан күрүөлээтилэр, ытык сэргэни сэргэхситтилэр, оҕо оонньуур былаһааккатын өрөмүөннээтилэр. Бары да бу былдьаһыктаах кэмнэргэ күн солото суох буоллаллар, олорор түөлбэлэрэ тупсарын туһугар ким да туора турбакка, биир сомоҕо буолан үлэлээтилэр.
Манна даҕатан эттэххэ, бу түөлбэ – “Агрогородок” оройуона баар буолбута быйыл оруобуна 20 сыла туолара субуотунньук кыттыылаахтарын өссө төгүл сэргэхситтэ.
Түөлбэ салайааччыта Алексей Осипов “Хатас хамсааһына” түмсүү кыттыылаахтарыгар, матырыйаал атыылаһарга харчынан көмөлөспүт түөлбэ олохтоохторугар спонсордарга: “Транзитсервис” тутуу маҕаһыыныгар, урбаанньыттар Александр Михайлович Павловка, Анастасия Николаевна Алексееваҕа, “Сандал” маҕаһыын кэлэктиибигэр, Татьяна, Андрей Осиповтар дьиэ кэргэттэригэр, Клавдия Егоровна Баишеваҕа уонна субуотунньукка кыттыспыт көхтөөх олохтоохторго ис сүрэҕиттэн махтанна.
Надежда ЕГОРОВА, “Саха сирэ” хаһыат, edersaas.ru