Бүгүн СӨ Нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлэ Степан Москвитин социальнай ситимнэринэн быһа сибээскэ тахсан, нэһилиэнньэ ыйытыытыгар хоруйдаата.
Степан Москвитин пандемия үлэ ырыынагар, ол иһигэр Саха сиригэр эмиэ дьайбытын ыйар. Өрөспүүбүлүкэҕэ күн бүгүн дьарыктаах буолуу сулууспатыгар 22421 киһи бэлиэтэммит (регистацияламмыт). Бу ааспыт сыллааҕы көрдөрүүнү икки төгүл куоһарарын бэлиэтиир. “Үлэттэн уурайыы, сарбыллыы, бастатан туран, аччыгый уонна орто биисинэскэ бэлиэтэнэр. Бу — атыы-эргиэн, өҥө, култуура, о.д.а. эйгэлэрэ буолаллар. Онон манна үрдээһин бэлиэтэнэр. Үрдээһин обургу ахсаанын сокуонунан үлэҕэ киирбэтэх сектор араҥата ылар”, — диэн эттэ.
СӨ Ил Дархана, СӨ Бырабыыталыстыбата манна улахан үлэни ыытарын, оперативнай штаб тэриллибитин этэр. Күн өрүү-өрүү ырытыһар, хас биирдии тэрилтэни, бары секторы ылан көрөр, сыаналыыр уонна биллэн турар, өйөөһүҥҥэ субсидия, нолуок эрэсиимэ, түүлэһии, уо.д.а. миэрэлэр ылыллалларын этэр.
Нэһилиэнньэ дьарыктаах буолуутун сулууспата “Содействие занятости населения на 2020-2024 сылларга” судаарыстыбаннай бырагыраама иитинэн 15 тыһыынча киһини, олохтоох дьону бырамыысыланнаска сыһыарыы бырагырааматын быйыл 9,5 тыһыынча киһини үлэнэн хааччыйар, 2400 киһини үөрэттэрэр былааннаахпыт диэн иһитиннэрдэ.
“Бүгүҥҥү күҥҥэ суоппардар, бульдозеристар, проходчиктар ирдэнэллэр. Сүрүн вакансияны биһиэхэ хайа-промышленнай комплексын тэрилтэлэрэ биэрэллэр. Онон оробуочай идэлэр бүгүҥҥү күҥҥэ бары суолталаахтар. Ханнык идэлэр ирдэнэллэрин биһиги саайтпытыгар көрүөххүтүн сөп”, — диэн хоруйдаата.
Людмила ПОПОВА, “Саха сирэ” хаһыат, edersaas.ru
Хаартыска: СтройСМИ.