Медицина Национальнай киинигэр баар Маммология өрөспүүбүлүкэтээҕи киинигэр “Оруосабай лиэнтэ-2019” аһаҕас аан күннэрэ алтынньы 29 күнүгэр саҕаланнылар.
edersaas.ru
Бу күн кэлбит дьоҥҥо үрдүк категориялаах онколог-маммолог быраас, үрдүк категориялаах хирург, медицинскэй наука хандьыдаата, СӨ Доруобуйа харыстабылын министиэристибэтин штаты таһынан кылаабынай исписэлииһэ, Маммология өрөспүүбүлүкэтээҕи киинин сэбиэдиссэйэ Любовь Коростелева бу уодаһыннаах ыарыы туһунан сүрүн иһитиннэриини оҥордо.
-Сыл аайы Арассыыйаҕа 65 тыһыынчаттан тахса дьахтар эмиий искэниттэн эмсэҕэлиир;
-Бу уодаһыннаах ыарыыттан сыл аайы 25 тыһыынчаттан тахса дьахтар өлөр;
-Хас күн аайы Арассыыйаҕа 47 оҕо ийэтэ суох хаалар (бу ыарыыттан сылтаан).
-Ыарыы тэтимнээхтик эдэримсийэр: эмиий искэнэ ордук 40-н ааспыт дьахталларга бэлиэтэнэр;
-Ыарыһахтар 30-35 бырыһыаннарыгар ыарыылара хойутаан биллэр.
Дьахтар олоҕо уһаан истэҕин аайы, бу ыарыы үөскүүр куттала үрдүүр. Хомойуох иһин, эмиий искэнинэн ыалдьыы бастакы миэстэҕэ сылдьар. Кэнники 20 сылга ыарыы элбээһинэ 40 бырыһыаҥҥа тэҥнэстэ.
Уодаһыннаах ыарыыга тириэрдиэн сөп чахчылар:
-Гормон дьайыылара, уйулҕа кэһиллиитэ, былчархай, куртах-оһоҕос, быар функциялара уларыйыылара, араас эчэйиилэр, куһаҕан дьаллыктар, утумунан бэриллии уо.д.а.
Эмиийи чинчийии аныгы ньымалара:
— Быраас клиническэй чинчийиитэ, пальпация;
-Сыыппаралаах маммография, томосинтез, луктография;
— УЗИ (ABVS, соноэластография);
-Магнитнай-резонанснай томография;
-Цитологическай чинчийиилэр;
-Патологическай көрдүгэн (очаг) биопсията;
-Гистологическай чинчийии;
-Иммуногистохимическай чинчийии.
50 саас кэнниттэн дьахталларга эмиий искэнэ үөскүүр кутталын төрүөттэрэ:
-Хойутаан кэлбит менопауза (ордук төрөөбөтөх дьахталларга);
-Аһара уойуу;
— Хаһан эрэ эмиийи эчэтии;
-Оҕолонон баран маститтааһыны хирургия өҥөтө суох суох эмтэнии;
-Оҕону аһара өр эмтэрии (2 сылтан ордук);
-Дьиэ кэргэҥҥэ ким эрэ ыалдьыбыта.
Бу ыарыыны эрдэттэн буллахха, эмтэнэр, үтүөрэр кыах толору баар. Күндү, кэрэ аҥаардар, бэйэҕитин таптааҥ, доруобуйаҕытыгар болҕомтолоохтук сыһыаннаһыҥ.
Надежда ЕГОРОВА, “Саха сирэ”, edersaas.ru