Хас биирдии оҕоҕо – 20 тыһыынча солкуобай

Бэйэни хааччахтанан олоруу кэмигэр оҕолоох дьиэ кэргэттэргэ, үлэтэ суох хаалбыт дьоҥҥо, коронавируһу утары охсуһа сылдьар медиктэргэ, социальнай үлэһиттэргэ судаарыстыба араас көрүҥнээх көмөнү оҥордо. Кэнники Владимир Путин бу миэрэлэр сайыҥҥы ыйдарга эмиэ төлөнөллөрүн туһунан иһитиннэрбитэ.

Бэс ыйыгар бэрэсидьиэн Владимир Путин бэйэни хааччахтанан олоруу кэмигэр 16-гар диэри саастаах оҕолоох дьиэ кэргэттэргэ 10 тыһыынча солкуобай көмөнү иккиһин биэрэргэ этии киллэрдэ.

Маннык көмөнү 3-16 саастаах оҕолордоох төрөппүттэр бэс ыйыгар ылбыттара. Кинилэр иккистээн ылалларыгар туох да сайабылыанньаны суруйаллара ирдэммэт, урут биэрбит докумуоннарыгар олоҕуран, 10 тыһыынча солкуобай каарталарыгар түһэр. Соторутааҕыта бырабыыталыстыба бэрэссэдээтэлэ Михаил Мишустин бу туһунан ыйаахха илии баттаата.

Көмөнү ыла илик төрөппүттэр алтынньы 1 күнүгэр диэри сайабылыанньаларын суруйуохтарын наада. Оччоҕо хас биирдии оҕолоругар 20-лии тыһыынча солкуобайы ылыахтара. Холобур, 5 оҕолоох ыал, саастарынан хапсар буоллахтарына, атын босоубуйалары аахпакка туран, 100 тыһыынча солкуобайы ылаллар. Бу оҕолоох дьиэ кэргэҥҥэ улахан көмө.

Бу 10 тыһыынча солкуобайдаах иккис көмөнү ааспыкка ылбатах, 3 саастарыгар диэри оҕолоох дьон бу сырыыга ылыахтара. Кинилэр муус устарга, ыам ыйыгар, бэс ыйыгар биир оҕоҕо 5-тии тыһыынча солкуобайдаах көмөнү ылан олороллор.

Бу көмөҕө анаан РФ бырабыыталыстыбата 270 миллиард солкуобайы көрбүтүн туһунан Михаил Мишустин иһитиннэрдэ.

“Арассыыйа оҕолоругар барыларыгар көмөлөһөр буолан баран, 16-18 саастаах оҕолорго тоҕо биэрбэттэрий? Кинилэр аһыылларыгар, таҥналларыгар, үөрэнэллэригэр элбэх харчы наада буолар эбээт. Харантыын кэмигэр кинилэр үлэлиир кыахтара суох”, — диэн үрдүкү кылаастарга үөрэнэр оҕолордоох төрөппүттэр мунаараллар.

Төрөппүттэр бэйэлэрин санааларын тиэрдэр туһуттан, петиция оҥорон тарҕаппыттара. Петицияҕа дойду үрдүнэн 138 тыһыынча киһи илии баттаабыта. РФ оҕо быраабыгар боломуочунайа Анна Кузнецова, ону тэҥэ, Федерация Сэбиэтин үөрэҕириигэ, наукаҕа, култуураҕа кэмитиэтэ 16-18 саастаах оҕолорго көмөлөһөр туһунан бырабыыталыстыбаҕа этии киллэрбиттэрэ. Ол эрээри, хомойуох иһин, кинилэр куоластарын истибэтилэр.

Ангелина Васильева, «Саха сирэ» хаһыат, edersaas.ru