Хас биирдии нэһилиэнньэлээх пууну сайыннарыы бырабыыталыстыба сүрүн соругунан буолар
Бу күннэргэ ситэриилээх былаас 2021 сыллааҕы отчуота буола турар. Биллэр төрүөтүнэн отчуоттар онлайн-эрэсииминэн ыытыллаллар.
Олунньу 6 күнүгэр, «Саха» НКИХ, «Якутия 24» телеханаалларынан ыытыллыбыт отчуоту СӨ Бырабыыталыстыбатын бастакы вице-премьерэ Кирилл Бычков иилээн-саҕалаан ыыппыта. Балтараа чаас кэриҥэ ыытыллыбыт отчуокка өрөспүүбүлүкэ олохтоохторуттан уопсайа 132 боппуруос киирбитэ.
СӨ экэниэмикэҕэ миниистирэ Майя Данилова олохтоохтор ыйытыыларыгар хоруйдууругар, хас биирдии нэһилиэнньэлээх пууну сайыннарыы бырабыыталыстыба сүрүн соругунан буоларын ыйда. Кини ханнык судаарыстыбаннай бырагыраамалар, национальнай бырайыактар баалларын сиһилии кэпсээтэ. Санатар буоллахха, ааспыт сылга Дьокуускай уонна Нерюнгри куораттары социальнай-экэнэмиичэскэй өттүнэн биир кэлим сайыннарарга аналлаах Ыйаах ылыллыбыта. «Арктика улуустарыгар тохтуур буоллахха, ааспыт сылга бырабыыталыстыбабыт Уһук Илини сайыннарар аналлаах судаарыстыбаннай бырагыраамаҕа Арктика түөлбэлэригэр бородуукта сыанатын түһэрэр уонна биир тэҥник тутар сыалтан эргиэн-логистическай кииннэрин тутарга федеральнай үп көрүллэрин ситиспитэ. Тыа сирин биир кэлим сайыннарыы бырагырааматын олоххо киллэрии эмиэ биир сүрүн соругунан буолар. Эбэн этэр буоллахха, тыа сирин-уотун сайыннарыыга саҥа үнүстүрүмүөн оҥоһуллар. Өрөспүүбүлүкэбитигэр территориялары урутаан сайыннарыыга атылыы эрэгийиэннээҕи территориялар тэриллэннэр уонна инвестиционнай бырайыактар өйөбүллэринэн нэһилиэктэр, сэлиэнньэлэр сайдыы саҥа таһымыгар тахсалларын толору хааччыйыахпытын сөп», — диэн Майя Андреевна быһааран биэрдэ.
Александр Тарасов, «Саха сирэ» хаһыат, edersaas