Бүгүн Өлөөн улууһун Харыйалааҕар 120 үөрэнээччи үөрэнэр уонна 75 кырачаан сылдьар кыахтаах оскуола-саады үлэҕэ киллэрэр тэрээһин үөрүүлээх быһыыга-майгыга буолан ааста. Олохтоохтор үөрүүлэрэ муҥура суох. Ол сөп. Тоҕо диэтэххэ, саҥа оскуола тутулларын өр күүттүлэр.
Үөрүүлээх тэрээһиҥҥэ СӨ Ил Дархана Айсен Николаев, «АЛРОСА» АХ генеральнай дириэктэрэ Сергей Иванов, СӨ үөрэҕин уонна наукатын миниистирэ Михаил Сивцев, СӨ арктика уонна хотугу норуоттар дьыалаларыгар миниистирэ Владимир Черноградскай, норуот дьокутаата Елена Голомарева кытыннылар.
Саҥа дьиэ үөрэх бары ирдэбиллэригэр толору эппиэттиир. Санатар буоллахха, эбийиэк олохтоох бүддьүөт, «АЛРОСА” АХ дивиденин уонна өрөспүүбүлүкэ инвестиционнай бырагырааматын үптэринэн тутулунна.Ил Дархан Айсен Николаев: “Миэхэ бу күн уратылаах. Саҥа оскуола тутуллуута — доҕорум уонна кэллиэгэм, Өлөөн оройуонун баһылыга Александр Степанович Иванов, үлэтин үтүө түмүгэ буолар. Кини дойдутун уонна дьонун туһугар күүскэ үлэлээбит патриотунан буолар», — диэн инстаграмыгар суруйбут.
edersaas.ru