Харыйа уота сандаарыа, быыстапка бэртээхэйэ саҕаланыа!

Ааптар: Эдэр Саас

Бөлөххө киир:

«Кыһын Саха сириттэн саҕаланар» бэстибээл чэрчитинэн, быйыл ханнык тэрээһиннэр күүтэллэрий?

«Кыһын Саха сириттэн саҕаланар» өрөспүүбүлүкэтээҕи бэстибээл чэрчитинэн, СӨ Култуура уонна духуобунай сайдыы министиэристибэтэ Саҥа дьыл иннинээҕи тэрээһиннэри тэрийэрин туһунан тустаах тэрилтэ пресс-сулууспата иһитиннэрэр. Быйылгы тэрээһиннэр куйаар ситиминэн, онлайнынан, социальнай тиһиктэринэн, тэлэбиисэринэн ыытыллыахтара.

Ахсынньы 1 күнүгэр, үгэс курдук, Дьокуускайга сүрүн болуоссакка харыйа уота сандаарыа. Быйыл күүтүүлээх күөх харыйабыт араас уотунан күлүмүрдүү оонньуурун «Саха» НКИХ уонна Якутия 24 ханаалларынан көрдөрүөхтэрэ.

«Санитарнай-эпидемиологическай ирдэбили тутуһан, нэһилиэнньэ этэҥҥэ буоларын туһуттан, дойду бастакы харыйатын уотун сандаардыы умнуллубат үөрүүлээх түгэнин тэлэбиисэринэн көрүөххүт. Видеонан (видеоверсия) көрдөрүү режиссерунан Үүнэр көлүөнэ тыйаатырын сүрүн режиссера Александр Титигиров ананна. Бырааһынньыктааҕы көрдөрүүлэргэ тыйаатырдар , кэнсиэртиир уо.д.а. тэрилтэлэр артыыстара кыттыахтара. Харыйа уотун сандаардыыны сэргэ, «Кыһын Саха сириттэн саҕаланар» бэстибээл чэрчитинэн, өрөспүүбүлүкэ дьоно-сэргэтэ олус биһирээбит, сэргээбит тэрээһиннэрэ, «Бал снежной долины» ааптарыскай куукулалар бэстибээллэрэ ыытыллыа. Сорох тэрээһиннэр «Арассыыйа — мин устуоруйам» музей комплексыгар былааннаннылар», — диэтэ СӨ Култуура уонна духуобунай сайдыы миниистирин бастакы солбуйааччы Владислав Левочкин.

Ол курдук, «Бал снежной долины» төрдүс төгүлүн ыытыллар өрөспүүбүлүкэтээҕи бэстибээл-быыстапканы сэтинньи 23 күнүттэн ахсынньы 22 күнүгэр диэри @simexsakha киирэн көрүөххүтүн сөп.

Сэтинньи 1 күнүттэн ахсынньы 6 күнүгэр диэри «Тепло якутской зимы» Саха сирин норуотун кыһыҥҥы национальнай таҥаһын хаартысканан өрөспүүбүлүкэтээҕи куонкуруһа @simexsakha ыытылла турар.

«Арассыыйа — мин устуоруйам» музей комплексыгар хас да тэрээһин буолуоҕа.

Сэтинньи 27 күнүгэр доруобуйаларынан хааччахтаах оҕолорго Саҥа дьыллааҕы бэйэ оҥоһуутун аккырыыккаларын презентацията былааннанна. Бу «Үтүө санааланыы аккырыыкката» социальный бырайыагы ZOOM көмөтүнэн көрүөххэ сөп.

Сэтинньи 29 күнүттэн ахсынньы 1 күнүгэр диэри «Fur & Gems» түүлээхтэн тигиилэрин уонна бирилийээннээх киэргэллэрин хаартыскаларынан быыстапкатын тэрийиигэ»Мин устуоруйам» кыттар. Онтон ахсынньы 1 күнүттэн, музейга култуура уонна ускуустуба Арктикатааҕы институтун (АГИКИ) «ARTIC FASHION SHOW-2020» дизайнерскай кэллиэксийэтин көрдөрүөхтэрэ.

Ахсынньы 1 күнүттэн «Арассыыйа — мин устуоруйам» саха норуотун остуоруйаларынан «Кыһыҥҥы остуоруйа» мультимедийнай бырайыагын @my_history_ykt көрдөрүө.

Маны сэргэ, дьон-сэргэ өрүү долгуйа күүтэр Марфа уонна Сергей Расторгуевтар ааттарынан Саха сирин судаарыстыбаннай циркатын «Тепло вечной мерзлоты» болҕомтону тардар, сүргэни көтөҕөр ураты туруоруута күүтэр. Эһигини имигэс акробаттар, канаатынан хорсун хаамааччылар, кырасыабай бэйэлээх хотугу табалар, мааны кырсалар, кэрэ саһыллар, өйдөөх лаайкалар, кырачаан холууптар, аттаах джигиттар, гимнастар, жонглердар, көрдөөх-нардаах клоуннар эҕэрдэлиэхтэрэ. Саҥа дьыл тыынын биэрэр, санааны өрүкүтэр, киһини үөрдэр-көтүтэр бэртээхэй туруорууну цирка анал саайтыгар киирэр көрүөххүт.

Саҥа дьылы үөрэ-көтө көрсүөҕүҥ. Барыта үчүгэй, тулабытыгар кэрэ буоларыгар баҕарыаҕыҥ, эрэниэҕиҥ, доҕоттоор!