Уопсастыба

Харыйа уота сандаарарын куйаар ситиминэн көрүөхпүт

Саҥа дьыллааҕы харыйа уота күлүмүрдүү оонньуурун быйыл онлайн-эрэсииминэн көрүөхпүт.

Куораттарга, тыа сирдэригэр күүтүүлээх бырааһынньык чугаһаабытын бэлиэтинэн, киин болуоссаттарга лаглайбыт күөх харыйаны симээн-киэргэтэн туруоруу үөрүүлээх түгэнэ буолар.
Олохтоммут үтүө үгэһинэн, Арассыыйа үрдүнэн аан бастакынан Саҥа дьыл харыйатын уотун сандаардыы үөрүүтэ ахсынньы 1 күнүгэр, Саха сирин киин куоратын болуоссатыгар буолуоҕа!
Быйылгы күүтүүлээх, долгутуулаах уонна үөрүүлээх түгэн, билэргит курдук, ураты форматынан ыытыллар. Куорат олохтоохторо уонна ыалдьыттара, санитарнай-эпидемиологическай балаһыанньанан, болуоссакка мустубаккыт. Харыйа уота сандаарарын дьиэҕитигэр олорон, тэлэбиисэринэн быһа биэриилэргэ көрүөххүт. Онлайн-тэрээһиннэргэ Үүнэр көлүөнэ тыйаатырын режиссера Александр Титигиров салайааччылаах култуура үлэһиттэрэ хамаанданан биир сүбэнэн үлэлии-хамсыы сылдьаллар.
Бу күн бары улуустарга Саргылаах Саҥа дьыл күөх харыйата араас өҥнөөх уотунан күлүмүрдүү оонньуоҕа. Саха сиригэр аан бастакынан сандаарбыт харыйа чаҕылхай уотуттан саҕыллан, атын эрэгийиэннэр үөрүүлээх эстэпиэтэни салҕаан, күүтүүлээх бырааһынньык чугаһаабытын биллэрэн, харыйаларын уотун сандаардыахтара.
Санатан эттэххэ, Дьокуускайга Ленин болуоссатыгар Саҥа дьыллааҕы харыйа уотун күлүмүрдэтэ оонньотуу сиэрэ-туома сыл ахсын «Кыһын Саха сириттэн саҕаланар» Бүтүн Арассыыйатааҕы бэстибээл чэрчитинэн ыытыллар.
Бэстибээл бырагырааматын туһунан сиһилии манна  көрүҥ.
СӨ Ил Дархан уонна Бырабыыталыстыба пресс-сулууспата
0
1

Добавить комментарий