Үөһээ Бүлүү улууһун Харбалааҕар бэҕэһээ оскуола үөрэнээччилэрэ уонна олохтоохтор дьарыктаналларыгар анаан саҥа спортивнай комплекс тутуллан үлэҕэ киирдэ. Саҥа комплекс нэһилиэк дьаһалтатын бүддьүөтүн көмөтүнэн уонна федеральнай анал бырагырааманан 3 мөл. солк тыырыллыбытынан тутулунна. Саамай кэрэхсэбиллээҕэ диэн Харбалаахтан төрүттээх, “Үөһээ Бүлүү” сопхуоска дириэктэринэн, райком иккис сэкиритээринэн таһаарыылаахтык үлэлээбит, гиирэ спордун маастара, хапсаҕайдьыт, хайыһардьыт, көҥүл тустууга ССРС спордун маастара Анатолий Васильевич Уларов аатын бу саҥа спортивнай комплекска иҥэрдилэр. Анатолий Васильевич аатын иҥэрэн, өйдөбүнньүк дуосканы саҥа тутууга туруордулар.
Александр ТАРАСОВ, «Саха сирэ» хаһыат, https://edersaas.ru
Люция Тойтонова, Үөһээ Бүлүү баһылыгын социальнай боппуруостарга солбуйааччы:
— Комплекс киэҥ-куоҥ саалалаах, иккис этээскэ туспа тустууга аналлаах эмиэ саала баар. Бу тэрээһиҥҥэ Анатолий Уларов 88 саастаах ийэтэ Евдокия Петровна, Дьокуускайтан кэргэнэ Екатерина Васильевна уонна кыыһа Вилена кыттан бардылар.
Нэһилиэнньэ саҥа спортивнай комплекс үлэҕэ киирбититтэн олус үөрдэ, астынна. Санатар буоллахха, у күннэргэ Үөһээ Бүлүү улууһун үрдүнэн 2017 сылы Чөл олох уонна Спорт сылынан биллэрбиппит. Онон саҥа дьиэҕэ олохтоохтор үөрэ-көтө кэлэн, спордунан дьарыктаныахтара диэн эрэнэбин.