Бэс ыйын 4 күнүгэр Таатта улууһун Харбалааҕар Афанасьев Артемий Викторович-Артыамый 2021 сыллаахха бэчээттэнэн тахсыбыт хоһоонун кинигэтин биһирэмэ бэрт тэрээһиннээхтик буолла.
Кырдьыга да, бибилэтиэкэр Акулина Федорова ыһыах бүччүм түһүлгэтин тэрийбит. Олус кэрэ, сылаас, чэбдик чараҥ ортотугар Эбэбит оргууйдук устан көрүстэ…
Бэйэ-бэйэбитин саҥалыы, сонургуу көрсүһэн, эҕэрдэлэһэн көрүстүбүт. Ааптарбыт хоһооннорун Валентина Семеновна киһи истэ олоруон курдук билиһиннэрдэ.
«Айыллаана»түмсүү айар куттаах ийэлэрэ сахалыы таҥнан-симэнэн хоһоон ааҕа тураллара хоһоон түһүлгэтин сахалыы тыыннаан биэрдэ. Хомсомуол кэмин хоһоонноругар холбуу тутан бүгүҥҥү күммүтүгэр кэскилгэ, сайдыыга ыҥырар хоһооннордоох Артёмий Викторовичка олохтоох дьаһалта, бэтэрээннэр сэбиэттэрэ эҕэрдэ туттарар үөрүүлээх түгэнин олохтоох мелодиспыт Виктор Туманов «Тыыннаах диэн үчүгэй даҕаны» ырыатынан ситэрэн, үрдэтэн биэрдэ. Маны сэргэ» ааптар «Уһуктуу»хоһоонун «Ыллык» түмсүү бөлөҕө ырыа гынан билиһиннэрдэ, Артемий Викторовичка бэйэлэрин анабыл хоһооннорун аахтылар. Ааптар хоһооннорун ис сүрэҕиттэн ылынан бар-дьоҥҥо иһитиннэрэр-биллэрэр, тэрилтэлэргэ тиһигэ суох күннэтэ тириэрдэ олорор Вера Дайбаннырова эҕэрдэтэ барыбытын үөртэ.
Хоһоон тула сэрэргэһии түгэнин ааптар»Чычымахха бастакы бэкээринэ» диэн хоһоонугар ахтыллар биэкэр Ньукулай сиэн кыыһа,»Таатта күөрэгэйэ» Анна Канаева ырыалара барыбытын айар турук иэйиитинэн куустулар. Түһүлгэни төгүрүччү тардыллыбыт алаадьылаах остуолларга наҕылыччы олорон сайыммытын көрсүү, хоһоонунан арчыланыы буолла диэн үөрүүбүн үллэһинним.
«Саха сирэ», edersaas.ru саайтка анаан Ирина ХАРЛАМПЬЕВА