Крым Евпаторий куоратыгар бэс ыйын 15-16 күннэригэр “Хара муора Кубога” харбааһыҥҥа күрэхтэһии бастакы түһүмэҕэ ыытылынна. Күрэхтэһиигэ 2002 сылтан кэлин төрөөбүт эдэр спортсменнар кытыннылар. Ол курдук, Симферополь, Москва, Луганскай, Воронеж, Екатеринбург онтон да атын куораттартан кэлбиттэр.
Саха сириттэн, анал спортивнай оскуола тириэньэрэ Михаил Михайлович Андылыров салалтатынан барыта 23 оҕо кытынна. Кинилэр түмүккэ 9 мэтээли ылары ситистилэр: 2 кыһыл көмүс, 4 үрүҥ көмүс уонна 3 боруонса.
Ол курдук, Маргарита Верещагина – 100 миэтэрэҕэ баттерфляйга уонна 100 миэтэрэҕэ көхсүнэн сытан эрэн харбааһыҥҥа бастакы миэстэлэри ылла. Итини тэҥэ кини 100 миэтэрэҕэ комплекснай харбааһыҥҥа иккис буолла. Өссө Саскылана Степанова – 50 миэтэрэҕэ көхсүнэн сытан эрэн харбааһыҥҥа, Станислав Сентисов – 50 миэтэрэҕэ баттерфляйга уонна 100 миэтэрэҕэ комплекснай харбааһыҥҥа иккис миэстэлэннилэр. Оттон үһүс бириистээх миэстэлэри Айыына Попова – 50 миэтэрэҕэ “баттерфляй” уонна 100 миэтэрэҕэ “брасс” ньыматынан харбааһыҥҥа итиэннэ Богдан Солонинка 50 миэтэрэҕэ баттерфляйга ыллылар.
Петр ПАВЛОВ.