Ил Дархан пресс-конференциятын кэмигэр “Эхо столицы” хаһыат эрэдээктэрэ Александр Прокопьев адаптивнай физкультура сайдыытын туһунан ыйытта. Дьокуускайга бэһис сылын адаптивнай физкультура киинэ үлэлиир. Ол эрээри онно лифт үлэлээбэт, кирилиэскэ таһаарар тэрил үксүгэр алдьанар эбит. Ону тэҥэ «Чолбон» бассейнҥа кулун тутар ыйтан чэбдигирдэр бөлөхтөрү сабан, спортивнайдары эрэ хааллараллар үһү диэн сурах баарын ыйытта.
edersaas.ru
Онуоха Егор Борисов Александр Прокопьевы бэйэтин, “Харысхал” пуонда дириэктэрэ Вера Душкевиһы ыҥыран, бары бииргэ ити тэрилтэлэри кэрийэн көрүөҕүҥ, кыһалҕаларын быһаарсыаҕыҥ диэн хоруйдаата.
Оттон “Чолбон” бассейн салалтата ити ыйытыыга бу курдук хоруйдуур:
— Харбааһыҥҥа өрөспүүбүлүкэтээҕи анал спортивнай оскуола аһылларынан, үлэ хаамыытыгар уларыйыылар киирэллэр. Спортивнай оскуола үлэтигэр сүрүн болҕомто спортивнай резервэни бэлэмнээһиҥҥэ уонна маастарыстыбаны үрдэтиигэ туһуланыа. Бассейн нэһилиэнньэ бары араҥатыгар, ол иһигэр оҕолорго, маассабай харбааһыҥҥа үлэтин тохтоппот.
Билиҥҥи кэмҥэ эрчиллэр бөлөхтөрү тэрийии, тренердэри, дьарык буолар кэмин аттарыы, о.д.а. үлэтэ ыытылла турар. Чэбдигирдэр бөлөхтөргө сылдьыбыт оҕолор бары салгыы дьарыктаналлар, арай, буолар кэмигэр (расписаниеҕа) кыра уларыйыылар бааллар. Спортивнай оскуола салалтата маассабай харбааһын уонна чэбдигирдэр бөлөхтөр дьарыктаналларыгар бары усулуобуйаны оҥорорго кыһаллар.
Ангелина Васильева, “Саха сирэ” хаһыат, edersaas.ru