Харантыын кэмигэр 31 онлайн-куонкуруска ситиһиилэммит Далбар Хотун
Соторутааҕыта биһигинниин, ньээм оттон мүөт оҥорор ньыматын, ырысыабын үллэстибит, Горнай улууһун Маҕарас бөһүөлэгин “Айтал” түөлбэтин салайааччыта Жоржетта Текеянова айымньылаах үлэтин-хамнаһын, ытыктабыллаах биһиги ааҕааччыларбыт, билэҕит.
Кини сыл ахсын түөлбэтин иһинэн “Дружная семейка” дьиэ кэргэн лааҕырын үлэлэтэр. Айылҕа кэрэ көстүүлэрин хаартыскаҕа түһэрэр, ас астыырын таптыыр, онтон да атын үгүс сөбүлүүр дьарыктаах. “Саха сирэ” хаһыат уопсастыбаннай кэрэспэдьиэнэ, литературнай викториналарбыт кыайыылааҕа, призера. “Эдэр саас” сайт ааптара. Жоржетта Ивановна – саха дьиҥнээх Далбар Хотуна “Арчы Дьиэтэ” духуобунай киин ыытар “Күн төгүрүк алаадьы” күрэҕэр көхтөөхтүк кыттарынан, алаадьы 28 көрүҥүн астыырынан эмиэ биллэр.
Бу күннэргэ Жоржетта Текеянова Дьокуускай куорат “Арчы дьиэтэ” Духуобунай киин уочараттаах онлайн-куонкуруһугар ситиһиилээхтик кыттыбытын истэн, төлөпүөннэһэ сырыттым:
—Бу куонкуруска тииҥ тириитинэн хаппар суумка тигэн көрдөрдүм. Ханнык баҕарар матырыйаалтан оҥоһукка күрэххэ анаан сиһик (ольха) шиишкэтин килиэйдээн, Дьөһөгөй оҕотун оҥордум. Итиэннэ “роса” бытыылкатыттан сардаана сибэккини “үүннэрдим”.
Харантыын кэмигэр, уопсайа 30-тан тахса араас онлайн күрэхтэһиилэргэ кытынным. Сиэммин Аделинаны кытыннаран, 10-ча грамотаны, сертификаты тутта. Сиэмминээн иккиэн эмиэ кыттабыт. Холобур, Улуу Кыайыы 75 сылынан, байыаннай таҥастаах хоһоон ааҕыытыгар Хаҥалас улууһа биллэрбит күрэҕэр уонна “Гордость России” Бүтүн Арассыыйатааҕы күрэхтэһиигэ ситиһиилэннибит. Сорох куонкурустарбыт түмүктэрэ биллэ иликтэр. Кэтэһэбит. Итиэннэ, билигин үгэс буолбут «Алгыстаах Алаадьы», “Сахалыы оонньуурдар” күрэхтэргэ эмиэ кыттаары бэлэмнэнэ сылдьабыт. Тобурах кэнниттэн Маҕарас тулатыгар, хата, ньээм от бөҕөтө үүнэн, бүгүн сарсыарда 600 устуука алтан төбөнү хомуйан, мүөт оҥордум, — диэн сонунун үөрэ-көтө үллэстэр Жоржетта Ивановна.
Ити курдук, дьиэҕэ олоруу эрэсиимигэр да сырыттарбыт, айар дьоҕурдаах, сүрэхтээх, көхтөөх дьоммут бириэмэлэрин олус көдьүүстээхтик, туһалаахтык атаараллар, үлэлииллэр-хамсыыллар, интэриэһинэйдик олороллор. Оттон сайыммыт барахсан салаллаахтаах кэлэн, хайыы үйэҕэ быйаҥыттан бэрсэн эрэрэ, ама, кими үөрдүбэт, долгуппат буолуой?!
Татьяна МАРКОВА, edersaas.ru